მსოფლიო

ეს იერიში მკაფიო გზავნილია ასადის რეჟიმისათვის, რუსეთისა და ირანისთვის - იენს სტოლტენბერგი

ნატოს გენერალური მდივნის, იენს სტოლტენბერგის განცხადებით, კოალიციური ძალების იერიში იყო გამიზნული სირიის მთავრობის ქიმიური იარაღის გამოყენების პოტენციალის შესამცირებლად.

„ეს ოპერაცია დამასკოს ქიმიური იარაღის გამოყენების შესაძლებლობების შემცირებისთვის იყო გამიზნული, რის გამოძიებასაც გაეროში ხელი რუსეთმა შეუშალა. ეს მკაფიო გზავნილია ასადის რეჟიმისათვის, რუსეთისა და ირანისთვის“, -თქვა სტოლტენბერგმა.

შაბათს გამთენიისას კოალიციურმა ძალებმა, რომლებშიც შედიან აშშ, დიდი ბრიტანეთი და საფრანგეთი, სირიაში სამიზნეებზე ავიადარტყმები განახორციელეს. მათი განმარტებით, ესაა პასუხი 7 აპრილს, ქალაქ დუმაზე განხორციელებულ იერიშზე, სადაც სავარაუდოდ ქიმიური იარაღი გამოიყენეს. დასავლეთი მომხდარში სირიის მთავრობას ადანაშაულებს, თუმცა ბაშარ ალ-ასადის რეჟიმი რაიმე მონაწილეობას უარყოფს.