სამართალი

ეს მანიკი სააკაშვილის დაუნდობელი ანგარიშსწორებაა და ამასთან საჩვენებელი მკვლელობაც იყო - რუსუდან შარაძე

ეს მანიკი სააკაშვილის დაუნდობელი ანგარიშსწორებაა და ამასთან საჩვენებელი მკვლელობაც იყო, - აცხადებს გაზეთ ,,ვერსიასთან“ საუბარში 10 წლის წინ მოკლული გურამ შარაძის შვილი მამის მკვლელობის ვერსიებზე საუბრისას.

,,გიორგი ბარათელს მოტივი არ ჰქონია, რომ მამაჩემი მოეკლა და მის ბრალეულობას ეჭვქვეშ იმთავითვე ვაყენებდი. ჩემი ეჭვი მკვლელობიდან მალევე დადასტურდა, როცა არაერთ მოწმეს შევხვდი და ვესაუბრე. მათ სულ სხვა მკვლელი ნახეს. აგრეთვე, ყველა, ვინც ბარათელს პირადად იცნობს, ხვდება, რომ ,,ალდაგის“ ვიდეოკამერის ფირზე აღბეჭდილი მკვლელი ის არაა.

გიორგი ბარათელი ჩემმა შუათანა ძმამ, გიორგიმ გამოზარდა ოპერატორად, ისევე, როგორც ტელევიზიის სხვა უამრავი თანამშრომელი თუ ვარსკვლავი. უბრალოდ, ბარათელი ამ საქმის გამო გამოჩნდა... მას კარგად ვიცნობ“, - ამბობს რუსუდან შარაძე.

მისივე თქმით, ის ცდილობს მკვლელობის წუთიდან იმის დამტკიცებას, რომ გურამ შარაძის მკვლელობა მიხეილ სააკაშვილის დაკვეთით მოხდა.

,,ეს მანიკი სააკაშვილის დაუნდობელი ანგარიშსწორებაა და ამასთან საჩვენებელი მკვლელობაც იყო. ყველას უნდა დაენახა, რომ არავის დაინდობდნენ, ვინც რეჟიმს შეეწინააღმდეგებოდა. ანუ, ხალხს უნდა ეფიქრა, გურამ შარაძეს რა უქნეს და ჩვენ რას გვიზამენო?! იფიქრეს კიდეც...“, - განაცხადა რუსუდან შარაძემ.

მისი თქმით, ბარათელი იმიტომ დასახელდა, რომ პოლიტიკურ მკვლელობას ბანალური, ოჯახური ტრაგედიის იერი მისცემოდა.

,,მოგეხსენებათ, ქვეყანას კომპრომატებითა და ჭორებით მართავდნენ. მამაჩემს კომპრომატი ვერ უპოვეს და საქმე ჩემი ძმისკენ წაიყვანეს. მის ირგვლივ საუკეთესო კანდიდატურა იპოვეს - გიორგი ბარათელი, თუმცა მისი სიმაღლე და ფიზიკური მონაცემები ისე განსხვავდება მკვლელისგან თუ მკვლელებისგან, როგორც ცა და დედამიწა. მოკლედ, ისე დახატეს, რომ 2007 წლის 20 მაისს ბარათელი თითქოს ქუჩაში მოსეირნობდა, შემთხვევით მამაჩემი დაინახა და გაახსენდა, რომ 7 წლის წინ, გიორგი შარაძემ აწყენინა, მამა იქვე მოკლა და ორი ტყვიაც დაახალა“, - ამბობს რუსუდან შარაშენიძე.