კომენტარი
ესაა დადგმული სპექტაკლი - ანა დოლიძე
დღეს იუსტიციის უმაღლეს საბჭოში უვადო მოსამართლეობის მსურველ 17 კანდიდატს გაესაუბრებიან. სულ უვადო მოსამართლეობაზე პრეტენზიას აცხადებს 51 კანდიდატი.
იუსტიციის უმაღლესი საბჭოს არამოსამართლე წევრმა, ანა დოლიძემ მის მიმართ გამოყენებული აცილების პროცედურა დადგმული სპექტაკლი უწოდა. დოლიძის განმარტებით, უვადო მოსამართლეობის კანდიდატების მიერ გასაუბრებიდან მისი აცილების შესახებ დაყენებული მოთხოვნები ერთი და იმავე შინაარსის იყო.
„აცილებების პროცესი იყო ერთი და იმავე ნიშნებით დახასიათებული, იყო ერთი და იგივე ტექსტი, ერთი და იგივე ხმები, იყო დახურული სხდომა, რომ არ ყოფილიყო მსჯელობის საშუალება. ამან ის აჩვენა, რომ ესაა მთლიანად დახურული პროცესი, სადაც თქვენ არ გაქვთ საშუალება, ნახოთ, რა კითხვებს სვამენ საბჭოს წევრები და როგორ პასუხობენ მოსამართლეები. ესაა დადგმული სპექტაკლი“, -თქვა დოლიძემ გასაუბრებების დაწყებამდე.
გუშინ უვადო მოსამართლეობის მსურველმა რამდენიმე კანდიდატმა გასაუბრებიდან ანა დოლიძის აცილება მოითხოვა. მიზეზად მათ დაასახელეს საბჭოს არამოსამართლე წევრის 6 თებერვლის განცხადება, რომლის მიხედვით, „ზურაბ ადეიშვილის ნარჩენები“ სასამართლო ხელისუფლებაში კონტროლისა და ძალაუფლების შენარჩუნებას ცდილობენ.