პოლიტიკა

„ევროპული საქართველო“ იურიდიული კომიტეტისგან დღეს კიდევ ერთხელ მოითხოვს მსჯელობის დაწყებას ხორავას ქუჩის დადგენილების პროექტზე

პარლამენტის ფრაქცია „ევროპული საქართველო“ იურიდიული კომიტეტისგან კიდევ ერთხელ მოითხოვს მსჯელობის დაწყებას ხორავას ქუჩის დადგენილების პროექტზე.

ინიციატივას ოპოზიციონერი დეპუტატები დღეს დააყენებენ და პროცედურების დაჩქარებას მოითხოვენ.

როგორც ფრაქციაში აცხადებენ, უმრავლესობა ამ პროცესს შეგნებულად, პოლიტიკური მოტივებით აჭიანურებს, რადგან არ სურს ყოფილ მაღალჩინოსნებს - შოთაძესა და ფხაკაძეს პასუხისმგებლობა დაეკისროთ.

„დადგენილების პროექტი ითვალისწინებს ხორავას საქმეზე ჩადენილ მკვლელობაში მხილებული პირის მიმართ ბრალის წარდგენას და ითვალისწინებს შსს-თვის და პროკურატურისთვის მოთხოვნას - გადადგას შესაბამისი ნაბიჯები,“-ამბობს ოთარ კახიძე.

იურიდიულ საკითხთა კომიტეტის თავმჯდომარე, ეკა ბესელია ბრალდებებს სიცრუეს უწოდებს და განმარტავს, რომ დადგენილების პროექტის განხილვის ვადა შეზღუდული არ არის.

„ცრუობს ბატონი კახიძე. არ ყოფილა მიღებული გადაწყვეტილება ბიუროზე, რომ დაჩქარებულად ყოფილიყო განხილვა,“-ამბობს ბესელია.