პოლიტიკა

ევროპული სასამართლოს გადაწყვეტილების ეჭვქვეშ დაყენება საფრთხეს უქმნის ქვეყნის ევროპულ მომავალს - ეკა მიშველაძე

საქართველოს პრეზიდენტის პრესმდივანმა ეკა მიშველაძემ განაცხადა, რომ საქართველოს მთავრობის მიერ ევროსასამართლოს გადაწყვეტილებისადმი უნდობლობა ქვეყნის ევროპულ მომავალს საფრთხეს უქმნის.

„დღეს, როდესაც ასე ახლოს ვართ ევროპასთან, როგორც არასდროს, ნებისმიერი კითხვის ნიშნის დასმა ევროსასამართლოს გადაწყვეტილებების კონტექსტში არის დარტყმა საქართველოს ევროპულ მომავალზე.

დამოუკიდებელი საქართველოს ისტორიის მანძილზე არასდროს, არც ერთ მთავრობას არ დაუყენებია ეჭვქვეშ ევროპული სასამართლოს გადაწყვეტილებების შესრულება“, - განაცხადა მიშველაძემ.

მიშველაძის თქმით, პრეზიდენტი ურჩევს მთავრობას, დაიცვას საქართველოს მიერ 1999 წელს ხელმოწერილი ადამიანთა უფლებათა ევროპული კონვენცია და აქედან მომდინარე ვალდებულებები.

„პრეზიდენტს მიაჩნია, რომ საქართველო დაიცავს ნაკისრ ვალდებულებებს, არ გადაუხვევს ევროპული გზიდან და არ იტყვის უარს ევროინტეგრაციაზე“,- თქვა პრესმდივანმა სამშაბათის ტრადიციულ პრესკონფერენციაზე.

პრეზიდენტის პრესსპიკერმა აღნიშნა, რომ საქართველოს ევროპული მომავალი არის „შეუქცევადი“.

ანა მებურიშვილი