მსოფლიო

ფეისბუკის მომხმარებელთა პერსონალური მონაცემების გამოყენებასთან დაკავშირებულ სკანდალში გახვეული Cambridge Analytica იხურება

ანალიტიკური კომპანია Cambridge Analytica, რომელიც სკანდალში გაეხვა ფეისბუკის მომხმარებელთა პერსონალური მონაცემების სავარაუდო გამოყენების გამო, იხურება. ვარაუდობენ, რომ აღნიშნული მონაცემებს დიდ ბრიტანეთში დაარსებული კომპანია იყენებდა 2016 წლის აშშ-ის საპრეზიდენტო არჩევნებსა და ბრექსიტზე გავლენის მოსახდენად.

თვითონ კომპანიაში ბრალდებებს უარყოფენ, თუმცა აღნიშნავენ, რომ მედიაგაშუქებამ ზიანი მიაყენა მათ ბიზნესსაქმიანობას და ყველა კლიენტი და დონორი დააკარგვინა. Cambridge Analytica-ში აცხადებენ, რომ უშედეგოდ ცდილობდნენ, დაემტკიცებინათ, რომ მათი საქმიანობის მეთოდები არა მარტო ლეგალური, არამედ ფართოდ მიღებულია ონლაინ რეკლამირებაში როგორც პოლიტიკურ, ისე სარეკლამო სფეროში, ხოლო კომპანიის თანამშრომლები ეთიკურად და კანონიერად მოქმედებდნენ.

Cambridge Analytica-ის მიერ ფეისბუკის 87 მილიონი მომხმარებლის პირადი ინფორმაციის მოპოვება დაადასტურა Facebook-ის დამფუძნებელმა, მარკ ცუკერბერგმა. ამის შესახებ მან ამერიკელ სენატორებთან შეხვედრაზე განაცხადა და მომხდარისთვის ბოდიში მოიხადა.