კომენტარი

გვაქვს ძალიან მძიმე მდგომარეობა - ირაკლი კობახიძე

პარლამენტის თავმჯდომარის, ირაკლი კობახიძის განცხადებით, ოპოზიციური პარტიები კანონპროექტებზე მსჯელობისთვისაც არ არიან მომწიფებული.

ასეთი შეფასება კობახიძემ 14 ოპოზიციური პარტიის მიერ ადგილობრივი თვითმმართველობის არჩევნებთან დაკავშირებით პარლამენტში წარდგენილი საკანონმდებლო წინადადებებს კომენტირებისას გააკეთა.

ოპოზიციამ “საარჩევნო კოდექსთან“ ერთად, ცვლილების განხორციელება “ადგილობრივი თვითმმართველობის შესახებ“ კანონში მოითხოვა, რომელიც დღეს “ადგილობრივი თვითმმართველობის კოდექსის“ სახით არსებობს და ასევე, პარლამენტს “თბილისის შესახებ“ კანონში ცვლილებების ინიციატივით მიმართა, რომელიც ამჟამად აღარ არსებობს და 2014 წლიდან ძალადაკარგულია.

პარლამენტის ბიუროს გუშინ ოპოზიციის საკანონმდებლო წინადადების განხილვაზე რეგიონული პოლიტიკის კომიტეტისთვის ვადის გაგრძელების და ამ განხილვაში იურიდიულ საკითხთა კომიტეტის ჩართვის თაობაზე უნდა მიეღო გადაწყვეტილება. საკითხს პარლამენტის თავმჯდომარის კრიტიკული გამოხმაურება მოჰყვა.

“გარდა იმისა, რომ ხარვეზები აქვთ სათაურებში, თვითონ წინადადებაც აბსურდულია. აქ არის მოთხოვნა იმის თაობაზე, რომ გაგრძელდეს განხილვის ვადა და იურიდიულ საკითხთა კომიტეტიც ჩაერთოს ამ განხილვაში. ეს მოთხოვნა გასაზიარებელი არ არის... ეს ყველაფერი მეტყველებს, რამდენად არის მომწიფებული კონკრეტულად ეს თუ ის პარტია იმისთვის, რომ თუნდაც კანონპროექტებთან დაკავშირებით იმსჯელონ - გვაქვს ძალიან მძიმე მდგომარეობა“, - განაცხადა ირაკლი კობახიძემ.

განხილვის ვადის გაგრძელების საკითხს ბიურომ მხარი არ დაუჭირა.

ნინო ექვთიმიშვილი