არქივი
სამართალი
ისედაც ვიცოდით, რომ მკვლელი გიორგი ჭანტურია იყო - გენერალ სამსონ ქუთათელაძის მეუღლე
მოკლული გენერალ სამსონ ქუთათელაძის მეუღლის, მეგი სირბილაძის განცხადებით, გამოძიება სწორად წარიმართა და ობიექტურ შედეგამდე მივიდა.
სირბილაძის განცხადებით, სამსონ ქუთათელაძეს კონფლიქტი ჰქონდა მხოლოდ გიორგი ჭანტურიასთან, რომელიც ქუთათელაძის მკვლელობის ბრალდებით დააკავეს.
„სწორად წარმოებული გამოძიება ობიექტური შედეგით დამთავრდა. მე და ჩემს ოჯახს გვინდა დიდი მადლობა გადავუხადოთ შსს-სა და ყველა სამართალდამცველს, ვინც მონაწილეობდა ამ საქმის გამოძიებაში. ისედაც ვიცოდით, რომ მკვლელი დაკავებული პიროვნება იყო და ამის საფუძველიც გვქონდა, რადგან მასა და ჩემს მეუღლეს შორის დიდი ხნის მანძილზე არსებობდა ფინანსური უთანხმოება. სწორედ ეს უთანხმოება იყო მკვლელობის მოტივი. საკმაოდ ხმამაღლა შემიძლია განვაცხადო, რომ ჩემს მეუღლეს სხვა პიროვნებებთან არანაირი კონფლიქტი არ ჰქონია, ის საერთოდ უკონფლიქტო პიროვნება იყო. ამით მე ვპასუხობ დაკავებული პირის ოჯახის განცხადებას, თითქოს ჩემს მეუღლეს არაერთ ადამიანთან ჰქონდა კონფლიქტი“, - თქვა სირბილაძემ და იმედი გამოთქვა, რომ სასამართლო გაითვალისწინებს გამოძიების ყველა დეტალს და მკვლელი კანონის მთელი სიმკაცრით დაისჯება.
შსს-ის ინფორმაციით, უწყებამ გენერალ სამსონ ქუთათელაძის მკვლელობის საქმე გახსნა.
მათი ინფორმაციით, გიორგი ჭანტურია განზრახ მკვლელობისა და ცეცხლსასროლი იარაღის მართლსაწინააღმდეგო შეძენა-შენახვა-ტარების ბრალდებით დააკავეს. დანაშაული 7-დან 15 წლამდე ვადით თავისუფლების აღკვეთას ითვალისწინებს.
გენერალი ქუთათელაძე მოკლული 15 იანვარს იპოვეს.