პოლიტიკა
ხათუნა გოგორიშვილი ევა გოცირიძის ინიციატივას მხარს არ დაუჭერს
„ევროპული საქართველოს“ წევრი ხათუნა გოგორიშვილის განცხადებით, მოსამართლეებისადმი კრიტიკის დასაშვები ნორმის დაწესება სიტყვის თავისუფლების შეზღუდვაა.
გოგორიშვილის თქმით, ის იუსტიციის უმაღლესი საბჭოს წევრის, ევა გოცირიძის ამ წინადადებას მხარს არ დაუჭერს.
„საჭიროა, რომ მოსამართლეები კანონს მისდევდნენ, ზეწოლის ქვეშ არ იყვნენ და გადაწყვეტილებებს დაკვეთით არ იღებდნენ. ეს საკითხი პირდაპირ დაკავშირებულია გამოხატვის თავისუფლებასთან. ჩემი აზრით, ბოლო პერიოდში, მოსამართლეების მიმართ გაკეთებული შეფასებები ისეთი მკაცრი არ იყო, როგორსაც ისინი იმსახურებენ. ამ წინადადებას არათუ მხარს არ დავუჭერთ, არამედ გამოხატვის თავისუფლების შეზღუდვას ყველანაირად შევეწინააღმდეგებით. განსაკუთრებით ისეთ შემთხვევებში, როცა საქმე კორუფციულ სქემებს და ზეწოლის ფაქტებს ეხება, რაც მოსამართლეებს კანონსაწინააღმდეგო ქმედებისკენ უბიძგებთ“, - განუცხადა გოგორიშვილმა „მოამბეს“.
შეგახსენებთ, იუსტიციის საბჭოს წევრის, ევა გოცირიძის ინიციატივით, მოსამართლეების შეურაცხყოფა საკანონმდებლო დონეზე უნდა ისჯებოდეს.
ანა მებურიშვილი