სამართალი

ხორავას ქუჩაზე მომხდარი მკვლელობის საქმეზე 51-ე სკოლის მოსწავლე დაიკითხა

ხორავას ქუჩაზე მოზარდების მკვლელობის საქმის ფარგლებში თბილისის საქალაქო სასამართლოში დღეს გამართულ პროცესზე, ბრალდების მხარის მოწმე, 51-ე საჯარო სკოლის მოსწავლე დაიკითხა.

ბრალდების მხარის განცხადებით, მოსწავლის ჩვენება მნიშვნელოვანია, რადგან ის არის თვითმხილველი პირი.

პროკურორ ზვიად ფხაკაძის განცხადებით, მოწმემ ისაუბრა იმ ფაქტობრივი გარემოებების შესახებ, რომელიც განვითარდა ხორავას ქუჩაზე, ე.წ. არკაში.

"მოწმემ დაადასტურა ფაქტობრივი გარემოებები, რაც პროდუქტიული იყო მნიშვნელოვანწილად და რაც ხელს შეუწყობს ბრალდების მხარეს, რათა თავისი არგუმენტები დაამყაროს საქმეში არსებულ სხვადასხვა მტკიცებულებებზე,“- განაცხადა პროკურორმა ზვიად ფხაკაძემ.

ცნობისათვის, 51-ე სკოლის ორი მოსწავლე ხორავას ქუჩაზე გასულ წელს, 1 დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა, მეორე კი, რამდენიმე ოპერაციის ჩატარების მიუხედავად 2 დეკემბერს საავადმყოფოში გარდაიცვალა.

ნინო ექვთიმიშვილი