პოლიტიკა

ხორავას ქუჩაზე მოზარდების მკვლელობის საქმე ქვეყნის ფარგლებს გაცდა - უჩა ნანუაშვილი

„ადამიანის უფლებათა ცენტრის“ იურისტისა და ყოფილი სახალხო დამცველი, უჩა ნანუაშვილის შეფასებით, ხორავას ქუჩაზე ორი მოზარდის მკვლელობა გაცდა ქვეყნის ფარგლებს.

როგორც ნანუაშვილმა აღნიშნა, ზაზა სარალიძისა და საქართველოში აკრედიტებული საელჩოების წარმომადგენლებთან შეხვედრაზე იყო კითხვები, რამდენად რეაგირებს სამართალდამცავი ორგანოები საქმეზე მითითებულ დარღვევებზე.

„ეს არის საქმე, რომელიც ქვეყნის ფარგლებს გაცდა, საერთაშორისო ორგანიზაციები და დიპლომატიური კორპუსები დაინტერესებულები არიან. იყო კითხვები, რამდენად რეაგირებს სამართალდამცავი ორგანოები მითითებულ დარღვევებზე. მნიშვნელოვანია, საერთაშორისო ორგანიზაციების ინფორმირება იმ ხარვეზებზე და დარღვევებზე, რაზეც ვსაუბრობთ. ამ ყველაფერზე უნდა იყოს რეაგირება ხელისუფლების მხრიდან, რათა სახელმწიფოს ნდობა კვლავ ჰქონდეს საზოგადოებას“, -უთხრა ნანუაშვილმა ჟურნალისტებს.

დღეს ხორავას ქუჩაზე მოკლული დავით სარალიძის მამა, ზაზა სარალიძე საქართველოში აკრედიტებული საელჩოების წარმომადგენლებს შეხვდა.