პოლიტიკა

ხვალინდელი აქცია იქნება პასუხი იმ ხელისუფლებას, რომელმაც დასცინა ზაზა სარალიძეს, მალხაზ მაჩალიკაშვილსა და საზოგადოებას - ზაალ უდუმაშვილი

10 ივნისს ხორავას ქუჩაზე მომხდარ მკვლელობასთან დაკავშირებით დაანონსებულ აქციასთან დაკავშირებით, ოპოზიციური პარტიები ლეიბორისტების ოფისში კონსულტაციებს მართავენ.

„ნაციონალური მოძრაობის“ ერთ-ერთი ლიდერის, ზაალ უდუმაშვილის თქმით, ხვალინდელი შეკრება იქნება პასუხი „ხელისუფლების დაცინვაზე“.

„ხვალინდელი აქცია, ეს არის საზოგადოების პასუხი ხელისუფლებას, იმ ხელისუფლებას, რომელმაც პრაქტიკულად დასცინა, დასცინა ზაზა სარალიძეს, მალხაზ მაჩალიკაშვილს, იმ საზოგადოებასა და იმ პროტესტს, რომელიც რამდენიმე დღის წინ მიმდინარეობდა რუსთაველის გამზირზე, პრაქტიკულად ჩვენ ვნახეთ, რომ არცერთი ნაბიჯი არ გადადგმულა ამ დღეების განმავლობაში იქითკენ, რომ რეალური მკვლელები და მფარველები დასჯილიყვნენ, ამიტომ, ახლა გადამწყვეტი მნიშვნელობა იმას კი არ აქვს, რომელი პოლიტიკური პარტია იდგება ხვალ რუსთაველზე ან არ იდგება, ამ გადაწყვეტილებას ყველა ინდივიდუალურად მიიღებს, თუმცა, მე დარწმუნებული ვარ, ოპოზიციური პარტიების დიდი უმეტესობა წარმოდგენილი იქნება ხვალ საპროტესტო აქციაზე. ახლა მნიშვნელობა აქვს საზოგადოებას, რომელიც ხვალ გასცემს პასუხს ხელისუფლებას“, - თქვა უდუმაშვილმა.