მსოფლიო
კიევი სასწრაფოდ უნდა გადავარჩინოთ! - მიხეილ სააკაშვილი 19 სექტემბერს უკრაინის დედაქალაქში ჩავა
საქართველოს ექს-პრეზიდენტმა და ოდესის ყოფილმა გუბერნატორმა მიხეილ სააკაშვილმა კიევში ჩასვლის თარიღი დააანონსა. როგორც მან ქალაქ ჩერნოვცებში გამართულ მიტინგზე განაცხადა, ის უკრაინის დედაქალაქს 19 სექტემბერს ეწვევა. ინფორმაციას Украинские Новости ავრცელებს.
„კიდევ რამდენიმე ქალაქს დავივლი, შემდგომ გადავინაცვლებთ კიევში. როგორც მსმენია, გზაში ვიღაცამ მითხრა, 19 სექტემბერი კიევის დამცველის - მიქაელ მთავარანგელოზის დღეა. სასწრაფოდ უნდა გადავარჩინოთ კიევი! ყველა გადავინაცვლებთ კიევში და იქ ვიქნებით. ეს იქნება დასაწყისი, მერე კი, რამდენიმე კვირის შემდეგ უფრო მეტნი ვიქნებით და რაღაც დროის შემდეგ ყველაფერი ისე დასრულდება, როგორც დამთავრდა შეგინის გამშვებ პუნქტში. გზა გაიხსნება, თუმცა ოლიგარქებისთვის საპირისპირო მხარეს, ხოლო უკრაინისთვის წინ - გამარჯვებისკენ“,-განაცხადა სააკაშვილმა.
შეგახსენებთ, დღეს მიხეილ სააკაშვილმა პოლიტიკური ტურნე დაიწყო უკრაინის ქალაქებში.
10 სექტემბერს 20 საათზე ოდესის ყოფილი გუბერნატორი თავის მხარდამჭერებთან ერთად სასაზღვრო-გამშვები პუნქტი შეგინი გადაკვეთა.
12 სექტემბერს ლვოვში, სასტუმრო ლეოპოლისის წინ სააკაშვილმა ხელი მოაწერა ადმინისტრაციული სამართალდარღვევათა პროტოკოლს უკრაინის საზღვრის უკანონოდ გადაკვეთის შესახებ. მისი საქმის სასამართლო განხილვა 18 სექტემბერს გაიმართება.
გამოძიება სააკაშვილის საქმეზე 4 მუხლითაა აღძრული, რასაც დღეს ხულიგნობის მუხლიც დაემატა.