მსოფლიო

კოალიციური ძალების იერიში აძლიერებს სირიელების სიმტკიცეს ტერორიზმის დასამარცხებლად - ბაშარ ალ-ასადი

სირიის პრეზიდენტი ბაშარ ალ-ასადი ირანელ კოლეგასთან, ჰასან რუჰანისთან სატელეფონო საუბრის დროს გამოეხმაურა კოალიციური ძალების მიერ სირიის მთავრობის ობიექტებზე განხორციელებულ იერიშს. მისი თქმით, ეს ქმედება გააძლიერებს სირიელთა სიმტკიცეს, რათა „ებრძოლონ და დაამარცხონ ტერორიზმი ქვეყნის ყველა მტკაველზე“.

რუჰანიმ განუცხადა ასადს, რომ ირანი სირიის გვერდით იქნება. ირანის პრეზიდენტმა აღნიშნა, რომ „ეს აგრესია ვერ დაასუსტებს სირიელი ხალხის სიმტკიცეს ტერორიზმის წინააღმდეგ ომში“.

აშშ-ის პრეზიდენტმა დონალდ ტრამპმა სირიაზე იერიშის მიტანის ბრძანება გასცა. დღეს გამთენიისას კოალიციურმა ძალებმა, რომლებშიც შედიან აშშ, დიდი ბრიტანეთი და საფრანგეთი, სირიაში სამიზნეებზე ავიადარტყმები განახორციელეს. მათი განმარტებით, ესაა პასუხი 7 აპრილს, ქალაქ დუმაზე განხორციელებულ იერიშზე, სადაც სავარაუდოდ ქიმიური იარაღი გამოიყენეს.

დასავლეთი მომხდარში სირიის მთავრობას ადანაშაულებს, თუმცა ბაშარ ალ-ასადის რეჟიმი რაიმე მონაწილეობას უარყოფს.