პოლიტიკა
კონცეპტუალურად ეს არის უფრო ეფექტური მთავრობა, ოღონდ არა ლიბერტარიანულ-მინიმალისტური თავისი კლასიკური გაგებით - დავით სერგეენკო
ჯანდაცვის მინისტრობის კანდიდატის, დავით სერგეენკოს განცხადებით, ის ჩართულია მმართველ გუნდში მიმდინარე კონსულტაციებში განახლებული მთავრობის შემადგენლობის შესახებ, რომელიც 3 კვირაში წარედგინება პარლამენტს. მისივე თქმით, საუბარია ასევე უწყებების გაერთიანებაზე.
„სამინისტროების გაერთიანებებაზე, რა თქმა უნდა, კონსულტაციები მიმდინარეობს, თუმცა ეს ცალსახად პრემიერის პრეროგატივაა, რომ მან მოახსენოს საზოგადოებას, კონკრეტულად რა ცვლილებები მოხდება და ამ ცვლილებების დადებითი მხარეები დაასაბუთოს“, - განაცხადა სერგეენკომ.
მან ასევე უპასუხა კითხვას, ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს ფუნქციათაგან რა ნაწილი უნდა შეითავსოს ჯანდაცვის სამინისტრომ.
„ჩემი ხედვა ამ მიმართულებით ვერ კონცენტრირდება რომელიმე ორი სამინისტროს გაერთიანებაზე. კონცეპტუალურად ეს არის უფრო ეფექტური მთავრობა, არა ლიბერტარიანულ-მინიმალისტური მცირე მთავრობა თავისი კლასიკური გაგებით, არამედ უფრო ეფექტური. ამას თავისი ლოგიკა აქვს, როგორ ხდება გადაწყვეტილებების მიღება და რამდენად მოაკლდება მიღებული გადაწყვეტილების შესრულების პერიოდი, რაც არის უმნიშვნელოვანესი ეკონომიკური ზრდისთვის. რაც შეეხება კონკრეტული სამინისტროების გაერთიანებას, მის დადებით თუ უარყოფით მხარეებს, ამაზე პრემიერ-მინისტრს უნდა მივცეთ საშუალება, რომ მოახსენოს საზოგადოებას",- განაცხადა სერგეენკომ.