საზოგადოება

კორონავირუსზე ტესტირება თბილისის ინფექციურში, ქუთაისსა და ბათუმშიც ჩატარდება

ახალ კორონავირუსზე ტესტირება ლუგარის ლაბორატორიის გარდა თბილისის ინფექციურ საავადმყოფოში, ბათუმსა და ქუთაისში მდებარე ლუგარის ლაბორატორიის განყოფილებებშიც იქნება შესაძლებელი.

აავადებათა კონტროლის ცენტრის ხელმძღვანელის მოადგილე, პაატა იმნაძე ამბობს, რომ ამ დროისთვის ქვეყანაში ლაბორატორიული კვლევისთვის საჭირო სინჯების საკმარისი მარაგებია და მათი შევსება მუდმივად მიმდინარეობს.

“სინჯების საკმაოდ დიდი მარაგი გვაქვს. დღეისათვის 3 000 ზე მეტი ანალიზისთვის საკმარისი მარაგია და შეკვეთილია შემდეგი მარაგები. ახლა ვიწყებთ დეცენტრალიზაციას ანალიზების. ინფექციურ საავადმყოფოს ჰყავს მომზადებული თანამშრომლები, გადავცემთ სინჯებს და ისინიც დაიწყებენ. ასევე, ჩვენი განყოფილებებია ლუგარის ლაბორატორიის, ბათუმსა და ქუთაისში ისინიც უკვე მომზადებული არიან, ტრენინგები აქვთ გავლილი. თუ საჭირო იქნება მზად ვართ მეზობელ ქვეყნებსაც დავეხმაროთ” - განაცხადა იმნაძემ.