საზოგადოება

ლილოსა და წინუბნის ტერიტორიაზე ბეტონის ქარხნნის მშენებლობა დამღუპველი იქნება - გულიკო ზუმბაძე

ჩვენი გადასაწყვეტია ლილოსა და წინუბნის ტერიტორიაზე მცხოვრები ადამიანების ბედი, როგორი იქნება ხვალ, – განაცხადა დღეს გამართულ პრესკონფერენციაზე თბილისის საკრებულოს ადამიანის უფლებათა დაცვისა და სამოქალაქო ინტეგრაციის კომისიის თავმჯდომარემ, გულიკო ზუმბაძემ.

ჟურნალისტებთან საკრებულოს დეპუტატმა იმ პროტესტზე ისაუბრა, რომლითაც ლილოსა და წინუბნის მოსახლეობა მათ ტერიტორიაზე ბეტონის ქარხნის აშენების გეგმას ეწინააღმდეგება.

საუბარია, დაახლოებით 10 ჰექტარ მიწის ფართობზე. როგორც ზუმბაძემ აღნიშნა, ეკოლოგიური მდგომარეობისთვის ასეთი ტიპის საწარმოს აშენება აღნიშნულ ტერიტორიაზე იქნება დამღუპველი.

დეპუტატს მიაჩნია, რომ რეკრეაციულ ზონაში არ უნდა აშენდეს ბეტონის ქარხანა, რადგან, მისი ინფორმაციით, აღნიშნული ტერიტორია საკურორტო-სასოფლო ზონის სტატუსის მქონეა.

ზუმბაძის თქმით, ტერიტორიაზე მისი სტატუსიდან გამომდინარე, უნდა განვითარდეს აგრარული მიმართულების საწარმოები.

“იმ ტერიტორიაზე, სადაც საკურორტო ზონა უნდა იყოს, ივლიან მძიმე მანქანები, ივლის მძიმე ტექნიკა, იქნება ხმაური. ეს არის დამღუპველი გადაწყვეტილება ამ ტერიტორიის მოსახლეობისთვის, წინა ხელისუფლებამ დაუშვა შეცდომა და დანაშაული, როცა იქ მოაწყო ღია ნაგავსაყრელი პოლიგონი. ერთი პრეცედენტი ამ ტიპის საწარმოს შექმნისაც კი, მე ყოვლად დაუშვებლად მიმაჩნია და ვიბრძოლებ იმისათვის, რომ ამ მოსახლეობის ინტერესები დავიცვა”, – განაცხადა გულიკო ზუმბაძემ.

რაც შეეხება იმას, თუ რა იქნება გამოსავალი, როდესაც აღნიშნულ ტერიტორიას ჰყავს კანონიერი მესაკუთრე მშენებლობის კანონიერი უფლებით, დეპუტატი ამბობს, რომ მესაკუთრემ მხოლოდ შესაბამისი ტიპის საწარმოები უნდა შექმნას თავის საკუთრებაზე.

,,ასე რომ, ჩვენი გადასაწყვეტია, დედაქალაქის თვითმმართველობის გადასაწყვეტია ამ მოსახლეობის ბედი, როგორი იქნება ხვალ და ზეგ. ბეტონის ქარხანა იქ არ უნდა აშენდეს“, - განაცხადა გულიკო ზუმბაძემ.

ნინო ექვთიმიშვილი