სამართალი

ლომთათიძის ქუჩაზე მომხდარ მკვლელობაში ბრალდებულებს წინასწარი პატიმრობა შეეფარდათ

თბილისის საქალაქო სასამართლოს გადაწყვეტილებით, თბილისში, ლომთათიძის ქუჩაზე მომხდარ მკვლელობაში ბრალდებულებს - ლევან ყანდირელაშვილს და გიორგი ჭალელიშვილს აღკვეთის ღონისძიების სახით წინასწარი პატიმრობა შეეფარდათ.

ბრალდების მხარე დაკავებულებისთვის პატიმრობას, ხოლო დაცვის მხარე მათ გათავისუფლებას ითხოვდა. ბრალდებულები დანაშაულს არ აღიარებენ.

შს სამინისტროს ინფორმაციით, გამოძიებამ დაადგინა, რომ ლ.ყ.-მ, თანმხლებ პირთან - გ.ჭ.-სთან ერთად, მიმდინარე წლის 4 თებერვალს თბილისში, ჭოლა ლომთათიძის ქუჩაზე, შურისძიების მოტივით, ნაცნობს - 1980 წელს დაბადებულ დ.ქ.-ს ცეცხლსასროლი იარაღიდან გასროლით სხეულზე მრავლობითი ჭრილობა მიაყენა, რის შედეგადაც იგი შემთხვევის ადგილზე გარდაიცვალა. ბრალდებულები კი შემთხვევის ადგილიდან მიიმალნენ.

სამართალდამცველებმა ორივე ბრალდებული ცხელ კვალზე, მომხდარიდან რამდენიმე საათში დააკავეს. 1988 წელს დაბადებული ლ.ყ. თბილისში, ხოლო 1994 წელს დაბადებული გ.ჭ. კასპის რაიონის სოფელ აღაიანში დააკავეს.

გამოძიება საქართველოს სსკ-ს 109-ე მუხლის მე-2 ნაწილის „ე“ ქვეპუნქტით და 236-ე მუხლის მე-2 და მე-3 ნაწილებით მიმდინარეობს, რაც 13-დან 17 წლამდე თავისუფლების აღკვეთას ითვალისწინებს.