პოლიტიკა
მამუკა ბახტაძე პრემიერ-მინისტრად დამტკიცების შემდეგ დღეს მთავრობის პირველ სხდომას გამართავს
მამუკა ბახტაძე საქართველოს პრემიერ-მინისტრად დამტკიცების შემდეგ დღეს მთავრობის პირველ სხდომაზე მთავრობის ახალი სტრუქტურის პრეზენტაციას გამართავს.
მამუკა ბახტაძის ინფორმაციით, მთავრობის დღევანდელ სხდომაზე ახალი სტრუქტურის შესახებ დეტალურად ისაუბრებენ.
მისივე თქმით, მთავრობაში მხოლოდ 11 სამინისტრო დარჩება და ეს რაოდენობა ეფექტიანი საქმიანობისთვის სრულიად ოპტიმალურია.
„ჩვენ ჩავატარებთ მთავრობის სხდომას, სადაც დეტალურად ვისაუბრებთ, როგორი ახალი სტრუქტურით წარვდგებით პარლამენტის წინაშე. შემიძლია დავადასტურო, რომ სამინისტროების რაოდენობა არ იქნება 11-ზე მეტი. როგორც განვაცხადე, ეს არის ოპტიმალური რაოდენობა იმისთვის, რომ ეფექტურად გავუმკლავდეთ არსებულ გამოწვევებს“, – განაცხადა მამუკა ბახტაძემ.
მთავრობის დღევანდელ სხდომაზე, ახალი სამთავრობო სტრუქტურის გარდა, კიდევ 12 საკითხზე იმსჯელებენ, მათ შორის ე.წ. ოთხოზორია-ტატუნაშვილის სიის დამტკიცების საკითხზე.
საქართველოს მთავრობის სხდომა 12:00 საათზე დაიწყება.