პოლიტიკა

მამუკა ბახტაძე საპარლამენტო უმრავლესობის წევრებს ხვდება

პრემიერ-მინისტრობის კანდიდატი, მამუკა ბახტაძე საპარლამენტო უმრავლესობის წევრებს ხვდება.

დეპუტატები პარტია „ქართული ოცნების“ ოფისში შეიკრიბნენ.

მამუკა ბახტაძე და საპარლამენტო უმრავლესობა მინისტრთა კაბინეტის შემადგენლობასა და სამინისტროების გაერთიანების საკითხზე იმსჯელებენ.

საპარლამენტო უმრავლესობის წევრის, ზაქარია ქუცნაშვილის ინფორმაციით, პრემიერ-მინისტრობის კანდიდატთან შეხვედრაზე საუბარი მთავრობის ფორმირებაზე იქნება.

„პრემიერ-მინისტრობის კანდიდატი ვალდებულია, არსებული მთავრობის სრული შემადგენლობა წარმოადგინოს. შემდეგ კანონში უნდა შევიდეს ცვლილება, თუ რომელი სამინისტროს შერწყმა იგეგმება და მხოლოდ ამის შემდეგ, ამას შეიძლება მოჰყვეს საკადრო ცვლილება. ასე რომ, დღეს არ იქნება სტრუქტურულ ცვლილებაზე საუბარი, დღეს იქნება არსებული მთავრობის შემადგენლობაში ყველა კანდიდატის წარმოდგენაზე, ხოლო შემდეგი ეტაპის საქმე იქნება, თუ რომელი სამინისტრო რომელს შეუერთდება და აქედან გამომდინარე, რომელი მინისტრი მოჰყვება სეკვესტრში“, – აღნიშნა ზაქარია ქუცნაშვილმა.

ნინო ექვთიმიშვილი