კომენტარი

„მე ეჭვი მიჩნდება, რომ ეს იყო წინასწარ განზრახული და დაგეგმილი ნაბიჯი, რაც კიდევ უფრო მეტად სამწუხაროა”-ირაკლი კობახიძე

რაც გააკეთა გიორგი მარგველაშვილმა, სამწუხაროდ, არის საქართველოს კანონდებლობის და პარლამენტის ინსტიტუტის უპატივცემულობა, – განაცხადა საქართველოს პარლამენტის თავმჯდომარემ, ირაკლი კობახიძემ მას შემდეგ, რაც გიორგი მარგველაშვილმა პარლამენტის სხდომათა დარბაზი დატოვა.

ირაკლი კობახიძის თქმით, დებატების გამართვის პროცედურა „საქართველოს პარლამენტის რეგლამენტითაა“ დადგენილი.

„რეგლამენტის თანახმად, ჯერ გამოდიან ფრაქციები, შემდეგ სხვა სუბიექტები, მათ შორის უმცირესობა, უმრავლესობა, ვიცე-სპიკერები, სპიკერი, ამის შემდეგ აქვს მომხსენებელს, ბატონ პრეზიდენტს, საკუთარი დასკვნითი სიტყვით გამოსვლის უფლება. რეგლამენტში სწორად არის აგებული დებატების პროცედურა”, – განაცხადა კობახიძემ.

მისივე თქმით, მას უჩნდება ეჭვი, რომ პრეზიდენტის საქციელი იყო წინასწარ განსაზღვრული და დაგეგმილი.

„კიდევ ერთხელ გავიმეორებ, რომ 90-იანი წლებიდან მოქმედებს საქართველოში რეგლამენტი და კონკრეტულად ეს პროცედურა. გამომდინარე იქიდან, რომ ეს არის რაციონალური პროცედურა, ეს ეხება ასევე სხვა ტიპის დებატებს, სხვა ტიპის დისკუსიებს პარლამენტში. საქართველოს პარლამენტში პირველად დადგა ეს დებატები კითხვის ნიშნის ქვეშ. ბატონ გიორგის და ქალბატონ ადას არ მოსწონთ ჩვენი რეგლამენტი, შეგვიძლია, ვისმჯელოთ, როგორ შეგვიძლია გადაიხედოს საქართველოს პარლამენტის რეგლამენტი. ის, რაც გააკეთა ბატონმა გიორგიმ, სამწუხაროდ, ეს არის საქართველოს კანონმდებლობისა და პარლამენტის ინსტიტუტის უპატივცემულობა, რაც არის სამწუხარო. მე ეჭვი მიჩნდება, რომ ეს იყო წინასწარ განზრახული და დაგეგმილი ნაბიჯი, რაც კიდევ უფრო მეტად სამწუხაროა”, – განაცხადა კობახიძემ.

შეგახსენებთ, რომ საქართველოს პრეზიდენტსა და პარლამენტის თავმჯდომარეს შორის კამათის შემდეგ, გიორგი მარგველაშვილმა პროტესტის ნიშნად პარლამენტის სხდომა დატოვა.

პრეზიდენტი დეპუტატების სიტყვით გამოსვლისას მათთვის პასუხის გაცემის საშუალებას ითხოვდა, რაზეც ირაკლი კობახიძემ განუმარტა, რომ რეგლამენტის მიხედვით ყველა კითხვაზე პასუხის შესაძლებლობა საბოლოო სიტყვით გამოსვლისას მიეცემოდა.

დღეს, საქართველოს პრეზიდენტი პარლმენტში თავის მეხუთე და პრეზიდენტის რანგში ბოლო მოხსენებით წარსდგა.