პოლიტიკა

მე ხმა მივეცი თბილისს, რომელშიც ყველას ეხალისება - გიორგი კვირიკაშვილი

საქართველოს პრემიერ-მინისტრმა გიორგი კვირიკაშვილმა ადგილობრივი თვითმმართველობის არჩევნებში საკუთარი არჩევანი საბურთალოზე, მე-4 ოლქის 24-ე საარჩევნო უბანზე დააფიქსირა. კვირიკაშვილის ხმის მისაცემად შვილთან ერთადვ მივიდა.

პრემიერ-მინისტრის თქმით, მან ხმა უკეთესის თბილისის სასარგებლოდ მისცა.

„მე ხმა მივეცი თბილისს, რომელშიც ყველას ეხალისება ცხოვრება , სადაც ურბანული ტრანსპორტი მოწესრიგებულია, სადაც მწვანე ზონებია იმისათვის, რომ ჩვენმა მოქალაქეებმა თავისუფლად ისუნთქონ, სადაც განათლების სისტემა მოწესრიგებულია, სადაც არის მაღალი ეკონომიკური დინამიკა, სადაც მეწარმეებს უხარიათ ბიზნესის წამოწყება და სადაც ბევრი სიცოცხლე ჩქეფს. მე მივეცი ხმა კიდევ უფრო უკეთეს თბილისს და დარწმუნებული ვარ , რომ თბილისი ნამდვილად ასეთი იქნება“, -თქვა პრემიერ-მინისტრმა.

დღეს ადგილობრივი თვითმმართველობის არჩევნები მიმდინარეობს. მოქალაქეები მთელი ქვეყნის მასშტაბით 64 საკრებულოს 2058 დეპუტატსა და 64 მერს პირდაპირი წესით 4 წლის ვადით ირჩევენ.

ანა მებურიშვილი