სამართალი

მე მქონდა ინფორმაცია, რომ მ.კ.-ის ტანსაცმელი გადაყრილი იყო - თბილისის პროკურორის ყოფილი მოადგილე

„მე მქონდა ინფორმაცია, რომ მ. კ.-ის ტანსაცმელი გადაყრილი იყო. თუ არ იქნებოდა გადაყრილი, უნდა ჩატარებულიყო ჩხრეკა და ეს ტანსაცმელი უნდა ამოღებულიყო“, -ამის შესახებ თბილისის პროკურორის ყოფილმა მოადგილემ, გიორგი გაბოძემ ხორავას ქუჩაზე მოზარდების მკვლელობის საქმეზე შექმნილი დროებითი საპარლამენტო საგამოძიებო კომისიის სხდომაზე განაცხადა. მან უპასუხა კომისიის წევრის, ირაკლი აბესაძის კითხვას, იცოდა თუ არა იმ ფაქტის შესახებ, რომ მ.კ.-ის სისხლიანი ტანსაცმელი ინახებოდა სახლში და რატომ არ მოხდა მისი ამოღება.

„3 დეკემბერს, მ.კ თავისივე ჩვენებაში ეუბნება გამომძიებელს, რომ მაისური, რომელიც მას ეცვა, იყო სისხლიანი, გამოიცვალა მეზობელთან ყოფნისას და მეზობელმა ეს მაისური მისცა მ.კ-ის ძმას, ლუკა კალანდიას. 3 დეკემბერს, ასევე იკითხება ლუკა კალანდია, რომელსაც არაფერს არ ეკითხებიან ამ ტანსაცმელზე, თუ სად წაიღო მან მ.კ-ის ტანსაცმელი. არცერთ ოფიციალურ ჩვენებაში არ ფიქსირდება, რომ მან ტანსაცმელი გადაყარა. 22 დეკემბერს ლუკა კალანდიას განმეორებითი დაკითხვის შემდეგ ის უკვე გამომძიებელს ეუბნება, რომ სისხლიანი მაისური გაირეცხა სახლში და დღესაც ჩვენს სახლში ინახებაო. ანუ 3 დეკემბერს გამომძიებელმა იცის და მას შეუძლია, ამოიღოს ტანსაცმელი, თუმცა ამას არ აკეთებს. დამეთანხმებით, რომ არასწორად თქვა გამომძიებელმა, როდესაც გითხრათ, რომ ეს ტანსაცმელი გადაყრილია და ვერ აღმოვაჩინეთო?“, -იკითხა აბესაძემ.

გაბოძის თქმით, ინფორმაცია, რომ მ.კ.-ის ტანსაცმელი გადაყრილი იყო, მიიღო პროკურორისგან ან ერთ-ერთი ხელმძღვანელი პოლიციელისგან. მან დასძინა, რომ მან რეკომენდაცია გასცა ჩხრეკის ჩასატარებლად.

„ჩემი რეკომენდაცია იყო, რომ ჩატარებულიყო ყველა ობიექტის ჩხრეკა, ვინც მონაწილეობდა ინციდენტში, მათ შორის ნათესავებისა და მეზობლების. თუ რაღაცნაირად ამის სტანდარტი იქნებოდა, რომ იქ გადამალეს მტკიცებულებები.

თუმცა, რა ტიპის მოქმედებები ჩატარდა, ეს უკვე განსაზღვრული იყო პროკურორისა და გამომძიებლის მიერ. ეს იყო გამომძიებლის შესაფასებელი“, - განაცხადა გაბოძემ.