უახლესი ამბები
არქივი
სამართალი
მეტი საჯაროობა - ნაზი ჯანეზაშვილი იუსტიციის უმაღლეს საბჭოს 2 წინადადებას წარუდგენს
იუსტიციის უმაღლესი საბჭოს არამოსამართლე წევრი ნაზი ჯანეზაშვილი დღევანდელ სხდომაზე საბჭოს წევრებს ორ ინიციატივას წარუდგენს. ერთი ეხება მოსამართლეთა რაოდენობის შესახებ ინფორმაციის საჯაროობას, ხოლო მეორე - საბჭოს დღის წესრიგის დახვეწას, რათა მედიამ და საზოგაოდებამ მეტი ინფორმაცია მიიღოს სხდომების საკითხებთან დაკავშირებით.
„ერთი ეხება ინფორმაციის საჯაროობას. ამ შემთხვევაში, ვგულისხმობ, ინფორმაციას მოსამართლეთა რაოდენობის შესახებ. ასევე, ინფორმაცია, უშუალოდ გენდერული ასპექტების მითითებით. სასამართლოს თავმჯდომარე კოლეგიებისა და პალატების შესახებ უნდა იყოს საჯარო, რომელიც პრაქტიკულად უნდა გამოქვეყნდეს ვებ-გვერდზე და ინფორმაცია ვაკანსიების შესახებ საზოგადოებას მიაწოდოს პროაქტიულ რეჟიმში.
მეორე ინიციატივა ეხება უშუალოდ დღის წესრიგების მომზადების თემას. ვფიქრობ, რომ ჩვენი დღის წესრიგები აუცილებელია, რომ უფრო დაიხვეწოს და შინაარსობრივი გახდეს, რათა მედიასა და საზოგადოებას ჰქონდეს მეტი ინფორმაცია. ეს საკითხი წინა სხდომაზე დავაყენე, მაგრამ კენჭისყრაზე არ დამიყენებია. ვფიქრობ, რომ დღეს რელევანტურია, მოხდეს კენჭისყრა. ასევე ერთი თემა გახლავთ ოქმების საკითხი. ჩვენი რეგლამენტის თანახმად საბჭო ვალდებულია წერილობითი ოქმები მოამზადოს, მაგრამ არ მზადდება უკვე მრავალი წელია. ამიტომ, ვთავაზობ ცვლილებას, რომ მომზადდეს ისეთი ტიპის ოქმები, რომელიც შესაძლებლობას მისცემს ჩვენს აპარატსა და საზოგადოებას, რომ ყოველი სხდომის შესახებ ინფორმაცია მიიღოს“, - განაცხადა საბჭოს არამოსამართლე წევრმა სხდომის დაწყებამდე.
საბჭოს წევრის, დიმიტრი გვრიტიშვილის თქმით, იუსტიციის საბჭოს საქმიანობის გამჭვირვალობა და საჯაროობა ისედაც უზრუნველყოფილია.
„იუსტიციის უმაღლესი საბჭოს საქმიანობის გამჭვირვალობა არის უზრუნველყოფილი. ხდება სხდომის ვიდეო-, აუდიოგადაღება, ჩაწერა, ასევე სხდომას ესწრება ყველა დაინტერესებული პირი, ეს იქნება არასამთავრობოები, თუ საერთაშორისო დონორი ორგანიზაციების წარმომადგენლები. ამიტომ ვფიქრობ, ქალბატონი ნაზის მიერ წარმოდგენილი ცვლილებები არა უფრო სხდომის საჯაროობას ეხება, არამედ არსებული საშუალებების დახვეწას“, - უთხრა გვრიტიშვილმა ჟურნალისტებს.
შეგახსენებთ, ამ წუთებში მიმდინარეობს იუსტიციის უმაღლესი საბჭოს სხდომა, რომლის დღის წესრიგში 6 საკითხია დაყენებული.
ანა მებურიშვილი