მსოფლიო

მიხეილ სააკაშვილი უკრაინის პრეზიდენტის წინააღმდეგ - სასამართლო პროცესი დღეს გაიმართება

დღეს, კიევის უზენაესი სასამართლო საქართველოს ყოფილი პრეზიდენტისა და ოდესის ექს-გუბერნატორის, მიხეილ სააკაშვილის უკრაინის პრეზიდენტის წინააღმდეგ სარჩელის განხილვას დაიწყებს. სააკაშვილი აპროტესტებს პეტრო პოროშენკოს ბრძანებას მისთვის მოქალაქეობის ჩამორთმევის შესახებ.

როგორც ოდესის ექს-გუბერნატორის ადვოკატმა, რუსლან ჩერნოლუცკიმ რუსთავი 2-ს განუცხადა, ბრალდების მხარეს საკმარისი მტკიცებულებები აქვს პოროშენკოს გადაწყვეტილების უკანონობის დასამატკიცებლად.

„დღეს გაიმართება პირველი სასამართლო პროცესი მიხეილ სააკაშვილის სარჩელის საფუძველზე, უკრაინის პრეზიდენტის წინააღმდეგ, პეტრო პოროშენკოს უკანონო ბრძანებით მისთვის მოქალაქეობის ჩამორთმევასთან დაკავშირებით. რთულია წინასწარ განსაზღვრო, თუ რა შედეგით დასრულდება სხდომა, რადგან ყველა ვხედავთ, როგორ მუშაობს სასამართლო სისტემა უკრაინაში. ის არ არის დამოუკიდებელი და ემორჩილება პრეზიდენტს. ჩვენ საკმარისი მტკიცებულებები გვაქვს იმისთვის, რომ მიხეილ სააკაშვილისთვის უკრაინის მოქალაქეობის ჩამორთმევის შესახებ ბრძანების უკანონობა დავამტკიცოთ. პარალელურად, მიმდინარეობს სასამართლო დავა უკრაინის საიმიგრაციო სამსახურთან. დღეს უკრაინის სახელმწიფოს არ გააჩნია მიხეილ სააკაშვილის ექსტრადიციის არცერთი კანონიერი საფუძველი“, - განაცხადა ჩერნოლუცკიმ.