პოლიტიკა
„მრეწველები“ საკონსტიტუციო ცვლილებებს მხარს უჭერენ
„მრეწველები“ საკონსტიტუციო ცვლილებებს მხარს უჭერენ.
შესაბამისი განცხადება დღევანდელ ბრიფინგზე პარტიის ლიდერმა ზურაბ ტყემალაძემ გააკეთა. მისი თქმით, უმრავლესობამ გაითვალისწინა ძირითადი შენიშვები და მაჟორიტარულიდან პროპორციულ სისტემაზე გადასვლის, ასევე პრეზიდენტის არჩევის წესთან დაკავშირებული ცვლილებების ამოქმედება, კონსესუსის საფუძველზე 2020-ის ნაცვლად, 2024 წლამდე გადადო.
როგორც ტყემალაძემ აღნიშნა, მისასალმებელია საარჩევნო ბარიერის 3%-მდე დაწევა, რაც მეტ პოლიტიკურ პარტიას მისცემს პარლამენტში მოხვედრის შანსს. მან ასევე აღნიშნა მიწის კანონთან დაკავშირებით მიღებული ცვლილებების მნიშვნელობა.
რაც შეეხება ოპოზიციის მხრიდან სესიაზე არ დასწრების საკითხს, ზურაბ ტყემალაძე მიიჩნევს, რომ თუ ოპოზიცია რეალურად ეწინააღმდეგებოდა ამ საკითხს, მაშინ მონაწილეობა უნდა მიეღო მასში და ეს დაეფიქსირებინა თავისი პოზიცია.
კონსტიტუციის გადასინჯვის წესის მიხედვით, პარლამენტი კონსტიტუციაში დაგეგმილი ცვლილებების პროექტის განხილვას 3 თვის შემდეგ მიუბრუნდება. პარლამენტი ახალ კონსტიტუციას საბოლოოდ, მესამე მოსმენით საშემოდგომო სესიაზე დაამტკიცებს.
ნინო ექვთიმიშვილი