არქივი
პოლიტიკა
მთლიანობაში ეს ცვლილებები არის სწორი - გია ხუხაშვილი
მოტივაციას რომ თავი გავანებოთ, შინაარსობრივად ეს ცვლილებები ჩემი აზრით საინტერესოა, იმიტომ, რომ თვითონ სისტემა იყო ეფექტიანობის ნაკლებობის ერთ-ერთი მიზეზი, - ასე აფასებს ექსპერტი პოლიტიკის საკითხებში გია ხუხაშვილი მთავრობაში განხორცილებეულ სტრუქტურულ ცვლილებებს.
როგორც ექსპერტმა „იბერია ტვ“-ს გადაცემაში ,,ახალი აბები არჩილ გამზარდიასთან ერთად“ სტუმრობისას განაცხადა, მთლიანობაში ეს ცვლილებები არის სწორი.
თუმცა ხუხაშვილი სკეპტიკურად უყურებს გარემოს დაცვის სამინისტროს სხვა უწყებებში ინტეგრაციის საკითხს.
,,საკმაოდ ხელოვნური წარმონაქმნები იყო ძალიან ბევრი ამ მთავრობაში, რაც ამძიმებდა ამ მდგომარეობას. ამ ბიუროკრატიულ ურთიერთკავშირებს ძალიან მოუქნელს ხდიდა და ერთ-ერთი მიზეზი ეს გახლდათ იმის, რომ ფაქტობრივად ჩვენ სახელმწიფოებრივი განვითარების დინამიკა ვერ ავკრიფეთ.
შესაბამისად, ის, რომ დავუშვათ ევროინტეგრაციის სამინისტრო საგარეო საქმეთა სამინისტროს შეერწყა, ეს აბსოლუტურად სწორი და ლოგიკური ნაბიჯია. იგივე სპორტის და ახალგაზრდობის საქმეთა სამინისტრო. ეს რა უბედურება იყო - პოსტაბჭოური სინდრომის ერთ-ერთი გამოტყორცნა. საკმაოდ, ლოგიკურად და სწორად გადანაწილდა ეს ფუნქციები ჩემი აზრით ორ სამინისტროზე.
ასე რომ საბოლოო ჯამში, ეს არის ჩემი აზრით, ხელისუფლების პირველი მცდელობა, რომ მმართველობითი სისტემის რაღაც რეფორმირება ჩაატაროს მისი ეფექტიანობის ასამაღლებლად.
თვითონ მთლიანობაში ეს ცვლილებები არის სწორი. ერთადერთი კითხვა მაქვს გარემოს დაცვასთან დაკავშირებით. ზუსტ რეგლამენტაციაზე საუბარი გამიჭირდება, მაგრამ ჩვენ კარგად გვესმის, რომ დღევანდელ გლობალურ სამყაროში გარემოს დაცვითი პრობლემატიკა ერთ-ერთი მთავარი პრიორიტეტია და ამ ვითარებაში ბუნებრივი რესურსების მართვის ნაწილის ეკონომიკის სამინისტროსთვის გადაცემა ჩემში გარკვეულ კითხვებს ბადებს ინტერესთა კონფლიქტთან დაკავშირებით, იმიტომ, რომ გარემოს დაცვითი ინტერესები და ეკონომიკის სამინისტროს ინტერესები წინააღმდეგობრივია ერთმანეთში. გამომდინარე იქიდან, რომ გარემოს დაცვითი ფუნქციები სოფლის მეურნეობის სამინისტროს გადაეცა და ეს ყველაფერი ურთიერთქმედებაში როგორ მოდის ერთმანეთთან, ეს უნდა ვნახოთ უფრო დეტალურად. გარემოს დაცვის სამინისტრო ან რაღაც დეპარტამენტის სახით ან დამოუკიდებელი ინსტიტუტის სახით თუ დარჩებოდა, ჩემი აზრით, ცუდი არ იქნებოდა“, - განაცხადა გია ხუხაშვილმა.
ნინო ექვთიმიშვილი