პოლიტიკა

მცოცავი ოკუპაციის მიზანი ოსეთის დე-ფაქტო ხელისუფლებასთან ე.წ. საზღვრის დემარკაციაზე საუბრის დაწყებაა - ზურაბ აბაშიძე

საქართველოს პრემიერ-მინისტრის სპეციალური წარმომადგენლის რუსეთთან ურთიერთობის საკითხებში, ზურაბ აბაშიძის განცხადებით, მცოცავი ოკუპაციის მიზანია, საქართველოს ხელისუფლებამ მოლაპარაკებები დაიწყოს სამხრეთ ოსეთის დე-ფაქტო მთავრობასთან, რაც ქართული მხარისთვის მიუღებელია.

„საოკუპაციო ხაზთან ბანერების აღმართვასა და ზოგადად იმას, რაც ხდება საოკუპაციო ხაზზე, აქვს ერთ-ერთი ასეთი მიზანი, რომ აიძულოს ქართული მხარე დაიწყოს საუბარი ოსეთის დე-ფაქტო ხელისუფლებასთან ე.წ. საზღვრის დემარკაციაზე, რაც ჩვენთვის აბსოლუტურად მიუღებელია“, - განაცხადა აბაშიძემ დღევანდელ პრესკონფერენციაზე.

აბაშიძის თქმით, ხელისუფლება ცდილობს, საერთაშორისო საზოგადოების ჩართულობით შეაჩეროს ოკუპაციის პროცესი.

„ჩვენ ვერანაირად ვერ დავიწყებთ დე-ფაქტო ხელისუფლებებთან ამაზე მოლაპარაკებებს. ჩვენ მაქსიმალურად შევეცდებით, ჩვენი მხრიდან საერთაშორისო საზოგადოების, დასავლელი პარტნიორების ზეწოლით ეს პროცესი შეჩერდეს, შეწყდეს და დაიწყოს ამ პრობლემების მოგვარება. ამას საქართველოს ხელისუფლება ცდილობს ყოველდღიურ რეჟიმში. ჩვენი საგარეო პოლიტიკის ძალისხმევის 80 პროცენტი ყოველდღიურად ამ უმძიმესი პრობლემის მოგვარებისკენაა მიმართული“, -განაცხადა პრემიერ-მინისტრის სპეციალურმა წარმოამდგენელმა.