მსოფლიო

ნამდვილი ტერაქტი, როგორც ბესლანში - თვითმხილველთა ინფორმაციით, ქერჩის კოლეჯში აფეთქების შემდეგ სროლის ხმა ისმოდა

ნაციონალური ანტიტეროსტული კომიტეტის განცხადებით, ყირიმის ნახევარკუნძულზე, ქალაქ ქერჩის პოლიტექნიკურ კოლეჯში დაუდგენელი ასაფეთქებელი მოწყობილობა ამოქმედდა. რუსეთის პრეზიდენტის, ვლადიმერ პუტინის პრესმდივნის, დმიტრი პესკოვის განცხადებით, „განიხილება ტერაქტის ვერსია“.

ტელეარხი „360“ თვითმხილველთა დაყრდნობით იუწყება, რომ ვიღაც პირმა ტექნიკუმის პირველ სართულზე ბოთლი ისროლა, რის შემდეგ მოხდა აფეთქება. კოლეჯის დირექტორის ოლგა გრებენიკოვას თქმით, მეორე სართულზე „ავტომატებით დარბოდნენ, აღებდნენ კაბინეტებს და კლავდნენ ყველას, ვისაც კი პოულობდნენ“. მისივე თქმით, ეს იყო „ნამდვილი ტერაქტი, როგორც ბესლანში“.

„უამრავი გვამია. უამრავი ბავშვის გვამია. ნამდვილი ტერაქტია“, - თქვა კოლეჯის დირექტორმა.

ერთ-ერთმა თვითმხილველმა Business FM-ს განუცხადა, რომ სასწავლებელთან ახლომდებარე სახელოსნოდან გამოსვლისას მან კოლეჯიდან სროლის ხმა გაიგო.

თავდაპირველად ვრცელდებოდა ვერსია გაზის აფეთქების შესახებ.

ბოლო ინფორმაციით, ქერჩის კოლეჯში მომხდარი აფეთქების შედეგად 10 ადამიანი დაიღუპა, ხოლო 50 დაშავდა.