პოლიტიკა

„ნაციონალური მოძრაობის“ ზუგდიდის ორგანიზაციის წევრებმა საკუთარი კანდიდატურები მოხსეს

„ნაციონალური მოძრაობის“ ზუგდიდის მაჟორიტარობის კანდიდატებმა გელა თოლორაიამ, ლევან მაქაცარიამ, გოდერძი კუკავამ და გიორგი თოფურიამ არჩევნებიდან კანდიდატურების მოხსნასთან დაკავშირებით საარჩევნო კომისიას მიმართეს.

ცესკო-ში ადასტურებენ, რომ განცხადება მიიღეს, თუმცა განმარტავენ, რომ პროცედურულად გადაწყვეტილება დაგვიანებულია.

როგორც ზუგდიდის 67-ე საოლქო საარჩევნო კომისიის თავმჯდომარემ მირანდა მესხმა განმარტა, რეგისტრაციიდან მოხსნის ვადები დასრულებულია, შესაბამისად, ეს ოთხი პირი ბიულეტენში დარჩება.

„4 პირის განცხადებაა შემოსული. აქედან სამი არის მაჟორიტარი კანდიდატი, თან პარტიულ სიაში, ერთი კი, მხოლოდ პარტიულ სიაში. რეგისტრაციიდან მოხსნის ვადები დასრულებულია. ჩვენ უბრალოდ განაცხადი მივიღეთ, დავარეგისტრირეთ. ბიულეტენის ტექსტში ეს ხალხი ჩვეულებრივ შევა და ჩვეულებრივ მიიღებენ მონაწილეობას. ხმების დაგროვების და ბარიერის გადალახვის შემთხვევაში, რა თქმა უნდა, იქნებიან არჩეულები“,- განმარტა მესხმა.

მონიკა დავლიანიძე