სამართალი

ნიკა მელიას მიმართ„ქართუ ბანკის“ სასამართლო პროცესზე გამოუცხადებლობისთვის, შესაძლოა, სანქცია იქნას გამოყენებული

„ქართუ ბანკის“ საქმეზე სასამართლო სხდომა დღეს ბრალდებულების გამოუცხადებლობის გამო გადაიდო.

როგორც მოსამართემ პროცესზე განმარტა, გამოუცხადებლობის შესახებ შესაბამისი ცნობა, მხოლოდ ერთ-ერთმა ბრალდებულმა, დავით გიორგაძემ წარადგინა.

რაც შეეხება მეორე ბრალდებულს ნიკანორ მელიას, მოსამართლემ განაცხადა, რომ გიორგაძის გამოუცხადებლობა მას სხდომაზე დასწრებისგან არ ათავისუფლებდა.

მოსამართლის თქმით, იმ შემთხვევაში თუ მომავალ პროცესზე მელია არ წარადგენს შესაბამის ცნობას, თუ რა მიზეზით არ დაესწრო პროცესს, შესაძლოა მის მიმართ სანქცია იყოს გამოყენებული.

ნიკა მელიას ადვოკატის გიორგი გელხაურის თქმით, ნიკანორ მელიასთვის ცნობილი იყო, რომ დღვანდელ პროცესს დავით გიორგაძე ვერ დაესწრებოდა, შესაბამისად პროცესი ვერ გაგრძელდებოდა და ვერ განიხილავდა სასამართლო.

„აქედან გამომდინარე, მან მითხრა, რომ თვითონაც არ მოვიდოდა. იმიტომ, რომ დაკავებული იყო სხვადასხვა საქმეებით. რაც შეეხება მომავალ პროცესს, მელია წარმოადგენს ცნობას, ან რაიმე სახის დოკუმენტს, რომელიც დაადასტურებს, რომ ის იყო რომელიმე შეხვედრაზე, ან ასრულებდა სამსახურებრივ მოვალეობას, ან ასე შემდეგ“,-აღნიშნა ადვოკატმა.

დღეს, ნიკა მელიამ , პარლამენტში განაცხადა, რომ „ქართუ ბანკის“ საქმის არსებითი განხილვა გადაიდო და შესაბამისი ინფორმაცია მას საქალაქო სასამართლოდან აცნობეს.

შეგახსენებთ, რომ „ქართუ ბანკის“ გაკოტრების მცდელობის საქმეზე, 2013 წელს ბრალი აღსრულების ბიუროს ყოფილ მაღალჩინოსნებს, ასევე მიმალვაში მყოფ ზურაბ ადეიშვილს წარედგინათ.

მონიკა დავლიანიძე