მსოფლიო

პოლონეთი რუს დიპლომატებს ქვეყნიდან აძევებს

დიდი ბრიტანეთის შემდეგ რუს დიპლომატებს პოლონეთი გააძევებს. აღნიშნული გადაწყვეტილების შესახებ პოლონეთის საგარეო უწყებამ უკვე აცნობა რუს ელჩს სერგეი ანდრეევს.

მანამდე იყო ცნობილი, რომ რუსული დიპლომატიური მისიის თავკაცი პოლონეთის საგარეო საქმეთა სამინისტროში დაიბარეს. ასევე რუსი ელჩები გამოიძახეს ლატვიის, ლიტვისა და ესტონეთის საგარეო უწყებებში.

როგორც რუსულ მედიას წყარომ აცნობა, ევროკავშირის რიგი ქვეყნები განიხილავენ რუსი დიპლომატების გაძევების შესაძლებლობას, ან თავისი დიპლომატების გაწვევას რუსეთიდან.

რუსი დიპლომატების გაძევება უკავშირდება ყოფილი რუსი ჯაშუშის, სერგეი სკრიპალისა და მისი ქალიშვილის სოლსბერიში მოწამვლას, რამაც რუსეთსა და დიდ ბრიტანეთს შორის მასშტაბური სკანდალი გამოიწვია. ლონდონმა უკვე გააძევა 23 რუსი დიპლომატი, რადგან დარწმუნებულია, რომ მოწამვლის უკან კრემლი დგას. რუსეთი ამას უარყოფს.

მომხდარის გამო ბრიტანეთი რუსეთის ხელისუფლებასთან უმაღლეს დონეზე კავშირებს წყვეტს.