პოლიტიკა
„ქართული ოცნება“, როგორც ინსტიტუცია, ვერ ჩამოყალიბდა, გრძელვადიანი პერსპექტივისთვის ვერ მოემზადა - პრემიერი
საქართველოს პრემიერ-მინისტრის, გიორგი კვირიკაშვილის აზრით, „ქართული ოცნება“ როგორც ინსტიტუცია, ვერ ჩამოყალიბდა და გრძელვადიანი პერსპექტივისთვის ვერ მოემზადა, ხოლო ბიძინა ივანიშვილის დაბრუნება მას გააძლიერებს.
„ძალიან კარგია პარტიისთვის, რომ ბიძინა ივანიშვილი თავმჯდომარე ხდება. ეს პარტიის გაძლიერებას ხელს შეუწყობს. სამწუხაროდ, დღემდე თვითონ პარტია, როგორც ინსტიტუცია „ქართული ოცნება“ ვერ ჩამოყალიბდა, გრძელვადიანი პერსპექტივისთვის ვერ მოემზადა.
ძალიან კარგია, რომ პარტია გაძლიერდება და უკვე არჩევნებიდან არჩევნებამდე, მთლიანად ამ ციკლის განმავლობაში იმუშავებს კიდევ უფრო აქტიურად. ეს ქვეყანაში დემოკრატიის განვითარებასაც შეუწყობს ხელს. ეს განსაკუთრებით მნიშვნელოვანია, რადგან 2024 წლისთვის ჩვენ უნდა მოვემზადოთ უკვე განვითარებული პარტიების სისტემით, ინფრასტრუქტურით. რაც საპარლამენტო რესპუბლიკაზე გადასვლისთვის არის უაღრესად მნიშვნელოვანი”, – თქვა პრემიერმა.
ცნობისთვის, დღეს პარტიის პოლიტსაბჭო იმართება.