რეგიონები

რაჭაში ადიდებულმა რიონმა სოფლების ღებისა და პატარა ღების დამაკავშირებელი ხიდი წაიღო

რაჭა-ლეჩხუმისა და ქვემო სვანეთის გუბერნატორის, არჩილ ჯაფარიძის ინფორმაციით, ძლიერი წვიმის შედეგად ადიდებულმა რიონმა რაჭაში, სოფლების ღებისა და პატარა ღების დამაკავშირებელი ხიდი წაიღო. ამის გამო 50-მდე ოჯახი გარესამყაროსაა მოწყვეტილი.

„სოფელ ღებსა და პატარა ღებს შორის დამაკავშირებელი ხიდი არის წაღებული. გარესამყაროს მოწყვეტილია 50-მდე ოჯახი, ადგილზე ტექნიკაა მობილიზებული, ველოდებით წყლის დონის დაკლებას მდინარეზე და დავიწყებთ სამუშაოებს. მხოლოდ ორ ოჯახს დაეტბორა სავარგული ღებში, ცოტა ხნის წინ გახლდით იქ. ამ წუთის მდგომარეობით, წყლის დონემ დაიწყო დაკლება. სავარაუდოდ, ეს პროცესი ასე გაგრძელდება და ხვალისთვის მოგეცემა საშუალება, რომ ტექნიკამ იმუშაოს“, – განაცხადა გუბერნატორმა.

გუბერნატორის თქმით, აბროლაურის მუნიციპალტეტში მდინარე ლუხუნის ადიდების გამო საავტომობილო გზა ჩაიკეტა, თუმცა რამდენიმე საათში პრობლემა აღმოიფხვრება.