პოლიტიკა

რაიმე დამატებითი რგოლის გაჩენაზე მთავრობის სტრუქტურაში საუბარი არ არის - ირაკლი კობახიძე

პარლამენტის თავმჯდომარის, ირაკლი კობახიძის განცხადებით, მთავრობის სტრუქტურულ ცვლილებებთან დაკავშირებით კონსულტაციები გაგრძელდება.

როგორც კობახიძემ ჟურნალისტებს განუცხადა, პრემიერი მამუკა ბახტაძე საპარლამენტო უმრავლესობის წევრებს შეხვდება.

მან კომენტარი სახელმწიფო მდივნის თანამდებობასთან დაკავშირებითაც გააკეთა.

„ჩვენ გვქონდა ზოგადად დისკუსია, აქ არ იყო დისკუსია სახელმწიფო მდივანზე ან რაიმე კონკრეტულ თანამდებობაზე. აქ არ არის საუბარი რომელიმე რგოლის დამატებაზე, საუბარია იმაზე, რომ მსხვილი სამინისტროების პირობებში ხომ არ არის მიზანშეწონილი მეორე დონის - მინისტრის მოადგილის დონის გამოკვეთა და მათთვის კონკრეტული მიმართულებების განსაზღვრა. ეს იყო ზოგადი ინიციატივა, რომელზეც მსჯელობა გრძელდება. რაიმე დამატებითი რგოლის გაჩენაზე მთავრობის სტრუქტურაში საუბარი არ არის. საუბარია 14 მინისტრის მაგივრად, 11 მინისტრის არსებობაზე მთავრობაში, შესაბამისად, 13 სამინისტროს მაგივრად, იქნება 10 სამინისტრო. ეს არის ამ ეტაპზე შედეგი ჩვენი კონსულტაციების. კონსულტაციები გრძელდება,“ - განაცხადა კობახიძემ.