მსოფლიო

რამზან კადიროვს ფეისბუკი და ინსტაგრამი დაუბლოკეს აშშ-ის სანქციების გამო

ჩეჩნეთის პირველ პირს, რამზან კადიროვს ფეისბუკსა და ინსტაგრამზე ( ეს სოციალური ქსელი ეკუთვნის კომპანია ფეისბუკს) ანგარიშები დაუბლოკეს. ისინი მიუწვდომელია 23 დეკემბრიდან. მარტო ინსტაგრამზე მას 3 მილიონზე მეტი გამომწერი ჰყავდა.

„მედიალოგიის“ რეიტინგის მიხედვით, მედიაში ყველაზე ციტირებად პოლიტიკოს-ბლოგერებს შორის კადიროვი პირველ ადგილს იკავებს.

ფეისბუკის ადმინისტრაციაში განმარტეს, რომ სოციალური ქსელების ანგარიშების დაბლოკვა უკავშირდება აშშ-ის ფინანსთა სამინისტროს მიერ დაწესებულ სანქციებს.

კადიროვი წინა კვირას „მაგნიტსკის სიაში“ შეიყვანეს.

„ჩვენთვის გახდა ცნობილი და ვადასტურებთ, რომ ანგარიშები ეკუთვნოდა პირს, რომელიც იმ განსაკუთრებულ მოქალაქეთა კატეგორიაში ირიცხება, რომლებზეც ვრცელდება აშშ-ის სავაჭრო-ეკონომიკური სანქციები. ამის გამო ფეისბუკს აქვს იურიდიული ვალდებულებები, გააუქმოს ამ პირის ანგარიში“, -უთხრეს ბიბისის რუსულ სამსახურს სოციალური ქსელის პრესსამსახურში.

თვითონ ჩეჩნეთის პრეზიდენტმა ტელეგრამის საკუთარ არხზე გამოეხმაურა ამ ფაქტს. მისი თქმით, მას დიდი ხანია სურდა ამ სოციალური ქსელების დატოვება, თუმცა ერიდებოდა გამომწერებსა და მეგობრებს.

ანა მებურიშვილი