პოლიტიკა

რეორგანიზებულ განათლების სამინისტროს ახალი ხელმძღვანელი ჰყავს

განათლებისა და მეცნიერების სამინისტროს უერთდება სპორტისა და ახალგაზრდობის საქმეთა სამინისტროს ახალგაზრდობის საქმეთა მართვის კომპონენტი. მინისტრის თანამდებობას კი დაიკავებს მიხეილ ჩხენკელი.

ამის შესახებ ცნობილი მთავრობის ადმინისტრაციაში გამართულ ბრიფინგზე გახდა, სადაც პრემიერ-მინისტრმა გიორგი კვირიკაშვილმა საკადრო ცვლილებები წარადგინა.

მიხეილ ჩხენკელი დღეს თბილისის სახელმწიფო უნივერსიტეტის პრორექტორია.

,,მას კარგად იცნობენ აკადემიურ წრეებში. მიხეილ ჩხენკელი პროფესიით არის მათემატიკოსი. მან აშშ-ში დაამთავრა პენსილვანიის უნივერსიტეტის დოქტურანტურა.

ბატონი მიხეილი 20 წლის განმავლობაში ასწავლიდა ამერიკის წამყვან უნივერსიტეტებში. მას მიღებული აქვს მრავალი ჯილდო სამეცნიერო და პედაგოგიური მოღვაწეობისთვის; მათ შორის პენსილვანიის უნივერსიტეტის არაერთი ჯილდო საუკეთესო სწავლებისათვის, Goldman Sachs -ის ფონდის პრემია, სამეცნიერო კვლევითი გრანტები და სტიპენდიები.

იგი კითხულობს ლექციებს აშშ-ში და აქვს მჭიდრო პროფესიული კავშირები მრავალ წამყვან უნივერსიტეტთან; მათ შორის ჰარვარდის, პრინსტონის, პენსილვანიის და ასე შემდეგ“, - განაცხადა გიორგი კვირიკაშვილმა.

ნინო ექვთიმიშვილი