მსოფლიო

რუსეთი რომც მთლიანად გაანადგურონ, ავტომატურად ჩვენი ბირთვული რაკეტები გაფრინდება და თავდაყირა დავაყენებთ მსოფლიოს - რამზან კადიროვი

„ამერიკა ანტირუსულ პოლიტიკას ატარებს“, - ამის შესახებ ჩეჩნეთის პირველმა პირმა რამზან კადიროვმა ამერიკულ არხ HBO-სთან საუბრისას განაცხადა.

კადიროვის თქმით, აშშ-ში იციან, რომ მას ძლიერი ჯარი ჰყავს, რომელიც თუ საჭიროა, „თავსაც ესხმის და იცავს“.

„ამერიკა ანტირუსულ პოლიტიკას ატარებს ქვეყნის მთავრობის წინააღმდეგ. მათ [აშშ] იციან, რომ ერთ-ერთი იმათგანი ვარ, ვინც რუსეთისთვის სიცოცხლეს მისცემს და ისიც, რომ კარგი ჯარი მყავს, რომელსაც შეუძლია, თავს დაესხას და დაიცვას... ვნახოთ, ვის რა გამოუვა“, - განაცხადა კადიროვმა.

კითხვაზე, მიიჩნევს თუ არა ამერიკას მტრად, კადიროვმა უპასუხა, რომ აშშ საკმარისად ძლიერი არაა, რომ რუსეთის მეტოქე იყოს.

„ამერიკა არაა ისეთი ძლიერი სახელმწიფო, რომ ჩვენ [რუსეთმა] ის მტრად განვიხილოთ. ჩვენ გვაქვს ძლიერი ქვეყანა და ჩვენ ვართ ბირთვული სახელმწიფო. ჩვენი სახლმწიფოც რომ მთლიანად გაანადგურონ, ავტომატურად ჩვენი ბირთვული რაკეტები გაფრინდება და თავდაყირა დავაყენებთ მსოფლიოს“, - განაცხადა კადიროვმა ამერიკულ არხ HBO-სთან საუბრისას.

ინტერვიუს სრული ვერსია გავა 18 ივლისს HBO Real Sports-ზე. მთლიანი გადაცემა ეძღვნება ჩეჩნეთს რამზან კადიროვის მმართველობის პერიოდში, კერძოდ კი, „ბრძოლას წესების გარეშე“-ს განვითარებას რესპუბლიკაში.