მსოფლიო

რუსეთთან კარგი ურთიერთობა კაია, ცუდი არ არის - ჰელსინკიში დონალდ ტრამპი ვლადიმერ პუტინს ხვდება

ფინეთის დედაქალაქ ჰელსინკიში, პრეზიდენტის სასახლეში აშშ-ის პრეზიდენტის, დონალდ ტრამპისა და მისი რუსი კოლეგის, ვლადიმერ პუტინის შეხვედრა იმართება. შეხვედრის დაწყებისას ტრამპმა განაცხადა, რომ მოსკოვთან კარგი ურთოერთობა სურს.

„მე ვამბობდი და დარწმუნებული ვარ, გაგიგონიათ წლების განმავლობაში...რუსეთთან კარგი ურთიერთობა კაია, ცუდი არ არის“, - თქვა ტრამპმა.

აშშ-ის პრეზიდენტმა პუტინს ფეხბურთის მსოფლიო ჩემპიონატის წარმატებით ჩატარება მიულოცა.

„გილოცავთ ნამდვილად კარგ მსოფლიო ჩემპიონატს, ერთ-ერთ საუკეთესოს“, - თქვა ტრამპმა.

ტრამპმა აღნიშნა, რომ ისინი მთელ რიგ საკითხზე ისაუბრებენ, იქნება ეს ბირთვული შეიარაღება, ჩინეთი, სამხედრო თუ სავაჭრო საკითხები. ტრამპს არ უხსენებია ის პრობლემები, რომლებმაც აშშ-სა და რუსეთს შორის დაძაბულობა გამოიწვია: რუსეთის მიერ ყირიმის ანექსია, მოსკოვის მიერ სირიის ლიდერის, ბაშარ ასადის რეჟიმის მხარდაჭერა, ასევე სკრიპალების მოწამვლა და აშშ-ის საპრეზიდენტო არჩევნებში ჩარევა.

თავის მხრივ, პუტინმა ტრამპს უთხრა, რომ მისთვის დიდი პატივია აშშ-ის პრეზიდენტთან შეხვედრა.

„ჩვენ ვაგრძელებთ მუდმივ კონტაქტს - ჩვენ ვისაუბრეთ ტელეფონით და შევხდით რამდენჯერმე სხვადასხვა საერთაშორისო ღონისძიებაზე.

მაგრამ, რა თქმა უნდა, ახლა დროა, ვისაუბროთ ჩვენ ორმხრივ ურთოერთობებსა და მსოფლიოში სხვადასხვა პრობლემურ წერტილზე. ისინი საკმაოდ ბევრი“, -დასძინა პუტინმა.

შეხვედრის დაწყებამდე ტრამპმა საკუთარ ტვიტერზე გააკრიტიკა აშშ-ის წინა მთავრობა რუსეთთან ურთიერთობების გაუარესებაში. მისი თქმით, ეს მოხდა წინა მთავრობის „სისულელესა და სიჩლუნგის გამო“. აღნიშნული ტვიტი ტრამპს რუსეთის საგარეო უწყებამ „დაულაიქა“ [მოუწონა].