საზოგადოება

რუსთავში მომხდარი აფეთქების შედეგად დაშავებული 9 წლის გოგონას მდგომარეობა მძიმეა

რუსთავში მომხდარი აფეთქების შედეგად დაშავებული 9 წლის გოგონას მდგომარეობა კვლავ მძიმეა.

როგორც ბოკერიას სახელობის თბილისის რეფერალურ ჰოსპიტალში აცხადებენ, პაციენტი რეანიმაციულ განყოფილებაში მართვით სუნთქვაზეა. მას დამატებით კვლევები უტარდება.

პაციენტს დაზიანება ძირითადად მუცლის ღრუში აღენიშნება. კერძოდ, ნაწლავების დაზიანების გარდა, გოგონას თეძოს ძვლის დაზიანებაც აქვს.

9 წლის გოგონას გადაუდებელი ოპერაცია თბილისში გადმოყვანამდე, რუსთავის საავადმყოფოში ჩაუტარდა.

რუსთავში, მე-19 მიკრორაიონის ერთ-ერთ საცხოვრებელი კორპუსის ეზოში გუშინ, ფიზიკური პირის ავტოფარეხის დემონტაჟის დროს, დაქირავებულ მუშებს მუშაობისას ჟანგბადის ბალონი აუფეთქდათ. აფეთქების შედეგად მიმდებარე ტერიტორიაზე არსებულ ფეხბურთის სტადიონზე და ეზოში14 ადამიანი დაშავდა, მათგან 5 ბავშვია.