მსოფლიო

სად იყავით აქამდე? - ბინალი ილდირიმი სამხედრო იერიშზე

თურქეთის პრემიერ-მინისტრმა - ბინალი ილდირიმმა კოალიციური ძალების მიერ სირიის მთავრობის ობიექტებზე განხორციელებულ იერიშს მხარი დაუჭირა და „პოზიტიური ნაბიჯი“ უწოდა.

მისი თქმით, მეტი უნდა გაკეთდეს მშვიდობის დასამყარებლად.

ილდირიმმა დაამატა, რომ სირიაში ომი 7 წელია მიმდინარეობს, თუმცა საერთაშორისო საზოგადოებამ ამაზე რეაგირება დააგვიანა.

„ჰუმანიზმი მაშინ გაგახსენდათ, როცა ქიმიური იარაღი გამოიყენეს? სად იყავით აქამდე?“, - იკითხა ილდირიმმა.

აშშ-ის პრეზიდენტმა დონალდ ტრამპმა სირიაზე იერიშის მიტანის ბრძანება გასცა. დღეს გამთენიისას კოალიციურმა ძალებმა, რომლებშიც შედიან აშშ, დიდი ბრიტანეთი და საფრანგეთი, სირიაში სამიზნეებზე ავიადარტყმები განახორციელეს. მათი განმარტებით, ესაა პასუხი 7 აპრილს, ქალაქ დუმაზე განხორციელებულ იერიშზე, სადაც სავარაუდოდ ქიმიური იარაღი გამოიყენეს. დასავლეთი მომხდარში სირიის მთავრობას ადანაშაულებს, თუმცა ბაშარ ალ-ასადის რეჟიმი რაიმე მონაწილეობას უარყოფს.