სამართალი
საია მცხეთის #41 საარჩევნო უბანთან დაკავშირებით სააპელაციო სასამართლოს მიმართავს
საქართველოს ახალგაზრდა იურისტთა ასოციაციამ სააპელაციო სასამართლოს მიმართა და მცხეთის რაიონული სასამართლოს ის გადაწყვეტილება გაასაჩივრა, რომლითაც ძალაში დარჩა მცხეთის საოლქო საარჩევნო კომისიის უკანონო გადაწყვეტილება წეროვანის #41 საარჩევნო უბანთან დაკავშირებით.
საუბარია 2016 წლის 30 ოქტომბერს მცხეთის 41 (წეროვანის დასახლება) უბანზე საუბნო საარჩევნო კომისიის მიერ 43 ბიულეტენის ბათილად ცნობას.
მოგვიანებით ინტერნეტ სივრცეში გავრცელდა სავარაუდოდ, ამავე უბანზე ხმის დათვლის პროცესში გადაღებული ვიდეო, საიდანაც საიას ინფორმაციით, ირკვევა, რომ საუბნო საარჩევნო კომისიამ ნამდვილი ხმები გააბათილა და ბათილ ბიულეტენებს მიათვალა საინიციატივო ჯგუფის მიერ წარდგენილი დამოუკიდებელი კანდიდატის, ცეზარ ჩოჩელის სასარგებლოდ მიღებული 16 ბიულეტენი.
,,ვინაიდან აღნიშნული ინფორმაცია ბადებდა ეჭვს, რომ აღნიშნულ უბანზე შესაძლოა ბიულეტენების ბათილად ცნობა მომხდარიყო განზრახ არასწორად, ჩვენ საჩივარი წარვადგინეთ მცხეთის საოლქო საარჩევნო კომისიაში და ამ უბნის ბათილი ბიულეტენების ხელახლა გადათვლა მოვითხოვეთ.
2016 წლის 2 ნოემბერს მცხეთის საოლქო საარჩევნო კომისიამ განუხილველად დატოვა საიას საჩივარი იმ საფუძვლით, რომ ორგანიზაციას უბანზე ამავე დარღვევასთან დაკავშირებით საჩივარი წარდგენილი არ ჰქონდა. საიამ საარჩევნო კომისიის გადაწყვეტილება, მცხეთის რაიონულ სასამართლოში გაასაჩივრა, რომელმაც საარჩევნო კომისიის არგუმენტები გაიზიარა.
საია კიდევ ერთხელ მიუთითებს იმ არასწორ პრაქტიკაზე, რომელსაც ჩვენ დაკვირვებით, საპარლამენტო არჩევნებზე დავების განხილვისას საოლქო საარჩევნო კომისიები და სასამართლოები მიმართავენ. რჩება შთაბეჭდილება, რომ ასეთი მიდგომა არა კანონიერების დადგენას, არამედ საჩივრების თავიდან არიდებას ისახავს მიზნად.
ამასთან, საოლქო საარჩევნო კომისიები უდავო და ზოგჯერ ერთადერთ მტკიცებულებად საუბნო საარჩევნო კომისიის წევრების ახსნა - განმარტებებს მიიჩნევენ, მათ შორის ისეთ შემთხვევებში, როდესაც ახსნა-განმარტება შემაჯამებელ ოქმებში არსებულ უზუსტობასთან დაკავშირებით უკანონო არგუმენტაციას ეფუძნება.
მოცემულ შემთხვევაში, წეროვანის #41 საუბნო საარჩევნო კომისიის წევრების მიერ საოლქო კომისიაში მოგვიანებით დაწერილი ახსნა-განმარტებების საფუძველზე, საოლქო საარჩევნო კომისიამ ვიდეოში ნახსენები სადავო 16 ბიულეტენი დამოუკიდებელი კანდიდატის, ცეზარ ჩოჩელის სასარგებლოდ მიიჩნია ისე, რომ მას არ შეუმოწმებია ბათილი ბიულეტენების სისწორე და არ გადაუთვლია ისინი, რითაც საოლქო კომისიამ დაარღვია საარჩევნო კოდექსის 21-ე მუხლის ე) ქვეპუნქტის მოთხოვნები’’, - ნათქვამია ახალგაზრდა იურისტთა ასოციაციის განცხადებაში.