მსოფლიო

სამხრეთ კორეის პრეზიდენტი კიმ ჩენ ინთან შეხვედრისთვის მზადაა

სამხრეთ კორეის პრეზიდენტმა მუნ ჩჟე ინმა ჩრდილოეთ კორეის ლიდერ კიმ ჩენ ინთან შეხვედრის მზადყოფნა გამოთქვა.

„მზად ვარ, უმაღლესი დონის შეხვედრა გავმართო იმ პირობით, თუ ის ხელს შეუწყობს ბირთვული პრობლემის გადაწყვეტასა და კორეებს შორის ურთიერთობების აღდგენას“, -თქვა სამხრეთ კორეის პირველმა პირმა პრესკონფერენციაზე.

მან დაამატა, რომ შეხვედრას აზრი ექნება, თუკი „პირობები იქნება დაკმაყოფილებული, ხოლო შედეგი გარანტირებული“.

გუშინ დემილიტარიზებულ ზონაში, ე.წ. „მშვიდობიან სოფელ“ პანმუნჯომში მხარეებს შორის ბოლო 2 წლის განმავლობაში პირველი მაღალი დონის შეხვედრა გაიმართა.

მოლაპარაკებების შედეგად გადაწყდა, რომ ჩრდილოეთ კორეა 2018 წლის ზამთრის ოლიმპიადაზე თავისი სპორტსმენებისა და ჩინოვნიკების დელეგაციას, ასევე მხარდამჭერთა გუნდს გააგზავნის. მსოფლიო დონის სპორტული ღონისძიება სამხრეთკორეულ ქალაქ ფხენჩხანში თებერვალში გაიმართება. სეულმა არ გამორიცხა, რომ ოლიმპიადის პერიოდში ფხენიანს სანქციებს მოუხსნის.

ასევე ქვეყნები შეთანხმდნენ, რომ განაახლებენ მოლაპარაკებებს სამხედრო საკითხებზე.

ანა მებურიშვილი