საზოგადოება

სამშენებლო უსაფრთხოების სტანდარტებს მომავალ წელსაც დიდი ყურადღება მიექცევა -თბილისის ვიცე-მერი

თბილისის ვიცე-მერი ირაკლი ხმალაძე თბილისში მშენბებლობაზე 2 მუშის დაშავების ამბავს გამოეხმაურა. ხმალაძის თქმით, ქალაქის მთავრობამ უკვე გაამკაცრა სამშენებლო უსაფრთხოების სტანდარტები და ბოლო პერიოდში 200-ზე მეტი გაფრთხილება თუ ჯარიმა გაიცა მშენებლებზე.

„ძალიან სამწუხარო ფაქტი მოხდა. ამ მიმართულებით რამდენიმე ნაბიჯი უკვე გადავდგით - გავამკაცრეთ სამშენებლო უსაფრთხოების სტანდარტები და გავაძლიერეთ მშენებლობებზე კონტროლი. ბოლო თვე-ნახევრის განმავლობაში ძალიან ბევრი მითითება გაიცა მშენებლებზე და ამ საკითხს მომავალ წელსაც დიდი ყურადღება მიექცევა. კიდევ უფრო გავაძლიერებთ ყურადღებას, რომ ყველა მშენებელმა მაქსიმალურად უზრუნველყოს უსაფრთხოების ნორმები. დაახლოებით 200-ზე მეტი გაფრთხილება და ჯარიმაა გაცემული ბოლო პერიოდში",- განაცხადა ირაკლი ხმალაძემ.

თბილისში, კოსმონავტების 45 ა-ში მიმდინარე მშენებლობაზე ბეტონის კონსტრუქციის შუა ნაწილი ჩამოინგრა და ორი მუშა მოიყოლა.

დაშავებული მუშები ღუდუშაურის კლინიკაში გადაიყვანეს.

მომხდარზე გამოძიება სისხლის სამართლის კოდექსის 240-ე მუხლით დაიწყო, რაც უსაფრთხოების ნორმების დარღვევას გულისხმობს.