პოლიტიკა

სამწუხაროდ, არ იცვლება რუსული მიდგომა და პოლიტიკა, ის აგრესიული და არაპრაგმატულია - ირაკლი კობახიძე

საქართველოს პარლამენტის თავმჯდომარემ ირაკლი კობახიძემ რუსეთის პრემიერ-მინისტრის, დიმიტრი მედვედევის ბოლო განცხადებაზე საუბრისას აღნიშნა, რომ რუსული მიდგომა და პოლიტიკა არ იცვლება.

„სამწუხაროდ, არ იცვლება რუსული მიდგომა და პოლიტიკა. ეს არის აგრესიული, არაპრაგმატული პოლიტიკა. რა თქმა უნდა, ჩვენ გვაქვს ჩვენი ხედვა, რომელიც მდგომარეობს იმაში, რომ ყველა ღონე უნდა ვიხმაროთ, საუბარია მშვიდობიან ზომებზე, რომ ვიბრძოლოთ ჩვენი ქვეყნის დამოუკიდებლობისა და ტერიტორიული მთლიანობის აღდგენისთვის“, – განაცხადა კობახიძემ.

რუსეთის პრემიერ-მინისტრის, დიმიტრი მედვედევის განცხადებით, საქართველოს ნატო-ში გაწევრიანებას შესაძლოა, კატასტროფული შედეგები მოჰყვეს.

„საქართველოს შესვლამ ნატო-ში შესაძლოა, საშინელი კონფლიქტის პროვოცირება მოახდინოს, გაუგებარია, რისთვისაა ეს საჭირო“, - განაცხადა მედვედევმა რადიო „Коммерсант ФМ“-თან ინტერვიუში.