საზოგადოება

საქართველოს ფიფა-ს პრეზიდენტი ესტუმრა

საქართველოს სპეციალური ვიზიტით ფიფა-ს პრეზიდენტი ჯანი ინფანტინო ეწვია. დელეგაციის წევრებს შორისაა საფრანგეთის ეროვნული ნაკრების ვეტერანი, მსოფლიოსა და ევროპის ჩემპიონი იური ჯორკაეფი. სტუმრები საქართველოს ფეხბურთის ფედერაციის წარმომადგენლებს შეხვდნენ და საფეხბურთო ინფრასტრუქტურა დაათვალიერეს. ისინი ყოფილი „ავაზას“ ტერიტორიაზეც იმყოფებოდნენ, სადაც დიღმის საფეხბურთო ცენტრი სწორედ ფიფა-ს თანადაფინანსებით შენდება.

მიხეილ მესხის სახელობის სტადიონზე კი მათ ქართული მედიის შეკითხვებს უპასუხეს.

ჯანი ინფანტინოს განცხადებით, საქართველოს ფეხბურთის ფედერაციამ „ზუსტად იცის, როგრო დახარჯოს ის თანხა, რომელსაც მას ფიფა და უეფა უგზავნიან.“

„საქართველოს საერთაშორისო ტურნირების მასპინძლობაც შეუძლია, რაც 21-წლამდელთა ევროპის ჩემპიონატის ჩატარებამ დაადასტურა“, - აღნიშნა ჯანი ინფანტინომ.

იური ჯორკაეფის მოსაზრებით, ფიფა-სათვის დიდი მნიშვნელობა აქვს იმას, რომ ფეხბურთი კიდევ ერთ, საქართველოსთანა პატარა ქვეყანაში ვითარდება.

„თქვენ მსოფლიოს ქართველი ფეხბურთელები, ქართული მენტალობა და ქართველი გულშემატკივრები გააცანით. ამით კი „ევრო-2024-ზე“ გერმანიაში ყველასათვის კარგი გარემო შექმენით“, - აღნიშნა იური ჯორკაეფმა.

მისივე თქმით, საქართველოში პირველად იმყოფება და აქ სტუმრობით მოხარულია.

„მართალია, ფრანგი ვარ, საფრანგეთში დაბადებული და გაზრდილი, მაგრამ ჩემი ფესვები სომხეთიდანაა. საქართველო და სომხეთი კი მოძმე ერები არიან“, - აცხადებს იური ჯორკაეფი.

ფიფა-ს ხელმძღვანელობა ქართულ ფეხბურთს დახმარებას სამომავლოდაც ჰპირდება.