პოლიტიკა
საქართველოში ვიზიტით პოლონეთის პრეზიდენტი იმყოფება
საქართველოს, ვიზიტით პოლონეთის პრეზიდენტი ანდჟეი დუდა ეწვია.
პოლონეთის პრეზიდენტის დახვედრის ოფიციალური ცერემონია საქართველოს პრეზიდენტის სასახლეში გაიმართება, რომელშიც მონაწილეობას საქართველოს პირველი ლედი მაკა ჩიჩუა და პოლონეთის რესპუბლიკის პირველი ლედი აგატა კორნჰაუზერი-დუდაც მიიღებენ.
ვიზიტის ფარგლებში ორი ქვეყნის პრეზიდენტი შეხვედრებს პირისპირ და გაფართოებულ ფორმატში გამართავენ. გარდა ამისა, ერთობლივ დოკუმენტს მოაწერენ ხელს და მედიისათვის პრესკონფერენციას გამართავენ.
ანდჟეი დუდა ასევე შეხვდება საქართველოს უმაღლეს თანამდებობის პირებს - საქართველოს პრემიერ-მინისტრს გიორგი კვირიკაშვილს და პარლამენტის თავმჯდომარეს ირაკლი კობახიძეს.
ვიზიტის ფარგლებში, პოლონეთის პრეზიდენტი ეროვნულ ბიბლიოთეკაში საჯარო ლექციასაც წაიკითხავს.
31 მაისს იგი ბათუმში აჭარის მთავრობის თავმჯდომარეს შეხვდება და გონიოს ციხეს დაათვალიერებს.
პოლონეთის პირველ ლედს კი, საქართველოს პირველი ლედი მაკა ჩიჩუა უმასპინძლებს.
მაკა ჩიჩუა და აგატა კორნჰაუზერ-დუდა თბილისისა და მცხეთის ისტორიულ ღირსშესანიშნაობებს დაათვალიერებენ.
ანდჟეი დუდას სახელმწიფო ვიზიტი საქართველოში 31 მაისს დასრულდება.
მონიკა დავლიანიძე