სამართალი

სასამართლომ ე.წ. სააფთიაქო ნარკომანიის საქმეზე დაკავებულ ექვსივე პირს წინასწარი პატიმრობა შეუფარდა

თბილისის საქალაქო სასამართლომ ე.წ. სააფთიაქო ნარკომანიის საქმეზე დაკავებულ ექვსივე პირს, მათ შორის სამედიცინო საქმიანობის სახელმწიფო რეგულირების სააგენტოს უფროსს გია თვალავაძეს აღკვეთის ღონისძიების სახით წინასწარი პატიმრობა შეუფარდა.

დაცვის მხარე დაკავებულებისთვის გირაოს შეფარდებას ითხოვდა, თუმცა სასამართლომ შუამდგომლობა არ დააკმაყოფილა და დაკავებულებს პატიმრობა შეუფარდა.

ცნობისთვის, სუს-მა ე.წ. „სააფთიაქო ნარკომანიის“ სფეროში ფსიქოტროპული საშუალებების უკანონო ბრუნვის საქმეზე მიმდინარე გამოძიების ფარგლებში, მოსამართლის განჩინების საფუძველზე, სამსახურებრივი უფლებამოსილების ბოროტად გამოყენების ფაქტზე საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს სსიპ სამედიცინო საქმიანობის სახელმწიფო რეგულირების სააგენტოს უფროსი გია თვალავაძე ორი დღის წინ დააკავა. ასევე, ბრალდებულის სახით დაკავებულები არიან უკანონო სამეწარმეო საქმიანობაში ჩართული საქართველოს მოქალაქეები: ნინო კ, ქეთევან ჩ, ლაშა ჩ, ნინო გ. და ნათელა მ.