საზოგადოება

სასამართლოს გადაწყვეტილება დაგვახიეს თავზე - ატენის ქუჩის მცხოვრებლები თბილისის მერიის წინააღმდეგ ჩივილს აპირებენ

ატენის 19 ნომრის მცხოვრებლები ნაწილი მერიის წინააღმდეგ პროკურატურაში ჩივილს აპირებს. ადგილობრივები აპროტესტებენ თბილისის მერიის არქიტექტურის სამსახურის 2018 წლის 15 იანვრის გადაწყვეტილებას, რომლის მიხედვით უწყებამ ტერიტორიაზე 27-სართულიანი საცხოვრებელი კორპუსის ნებართვა გასცა.

ადგილობრივების ადვოკატის, დიმიტრი გაბუნიას თქმით, ამით მერიამ უგულებელყო უზენაესი სასამართლოს 2017 წლის 20 აპრილის გადაწყვეტილება, რომელმაც ატენის ქუჩაზე მშენებლობა უკანონოდ გამოაცხადა.

„სასამართლოს გადაწყვეტილება დაგვახიეს თავზე, სრული ამ სიტყვის მნიშვნელობით და არ იქნა ეს სასამართლო გადაწყვეტილება შესრულებული“. -თქვა ადვოკატმა პრესკონფერენციაზე.

გაბუნიას თქმით, თბილისის მერმა კახა კალაძემ თავისი წინასაარჩევნო დაპირება არ შეასრულა.

„ბატონ მერს მივმართავთ პირდაპირ, თუ ის არ არის საქმის კურსში მისი სამსახურის მიერ გაცემულ ნებართვასთან დაკავშირებით. სხვათა შორის, პირველი ნებართვა, ერთ-ერთი პირველი ნებართვა, რომელიც ბატონმა კალაძემ გასცა, ეს არის 27-სართულიან კორპუსზე მშენებლობის ნებართვის გაცემა, რაც პირდაპირ ეწინააღმდეგება მის საარჩევნო დანაპირებს, რომ ის არავითარ შემთხვევაში არ გასცემდა ამ ნებართვას,“ - თქვა ადვოკატმა.