მსოფლიო

სერგეი სკრიპალისა და მისი ქალიშვილის მოწამვლის მიზეზი მისი სახლის შესასვლელი კარია - ბრიტანეთის პოლიცია

ყოფილი რუსი ორმაგი აგენტი სერგეი სკრიპალი და მისი ქალიშვილი იულია მათი სახლის ზღურბლზე მოწამლეს. ასეთი დასკვნა დადო ბრიტანეთის კონტრტერორისტულმა პოლიციამ.

ექსპერტების დასკვნით, სკრიპალის სახლის შესასვლელი კარი ნერვო-პარალეპტიკური ნივთიერებით იყო გაჟღენთილი. ნივთიერების ყველაზე მაღალი კონცენტრაცია სწორედ შესასვლელ კართან დაფიქსირდა.

ბრიტანული პოლიციის თქმით, ისინი გამოძიებას აგრძელებენ.

სკრიპალი და მისი ქალიშვილი 4 მარტს მოწამლეს ბრიტანეთის ქალაქ სოლსბერიში. გარდა ამისა დაშავდა 20-მდე სამოქალაქო პირი და პოლიციელი. როგორც დადგინდა, სკრიპალის მოსაწამლად რუსეთში გამზადებული ნერვო-პარალეპტიკური გაზი სახელწოდებით ნოვიჩოკი გამოიყენეს.

მოწამვლაში ლონდონი რუსეთს ადანაშაულებს, რის გამოც დასავლეთმა 100-ზე მეტი რუსი დიპლომატი გააძევა.

აშშ-მ ორშაბათს მიიღო გადაწყვეტილება, რომლის მიხედვით, ქვეყანას 60 რუსი დიპლომატი დატოვებს, მას შეუერთდნენ გერმანია, უკრაინა, დანია, საფრანგეთი, ჩეხეთი, ლატვია, ესტონეთი, ლიტვა, იტალია, კანადა, ჰოლანდია, რუმინეთი, ფინეთი, ესპანეთი და ა.შ.